Covalima (RCCT) 08-03-23–World Vision hetan fundu husi povu amerikanu atraves de USAID hodi realiza komemorasan loron mundial feto iha Munisipiu Covalima.
Jerente iha word vision area Covalima João Moniz, hatete lia ne’e iha salaun administrasaun munisipiu Covalima wainhira selebra loron internasional ba feto sira.
“Ha’u hakarak atu hatete deit katak World Vision hakarak komemora loron mundial feto iha Covalima, tanba World Vision hetan fundus husi povu Amerikanu liu husi USAID ho razaun hirak ne’e mak ami implementa eventu ida ne’e iha Munisípiu Covalima” informa Jerente World Vision Covalima Area Programa João Moniz, ba jornalista sira sira hafoin remata komemora loron mundial feto ne’ebé hala’o iha salaun Administrasaun Munisípiu Covalima Kuarta (08/03).
Nia dehan liu husi komemora loron mundial ida ne’e hakarak atu fo hatene ba feto Covalima oinsa mak atu sira hatene igualidade ba jéneru, tanba feto mos iha oportunidade atu avansa ba oin.
“Feto sira mos bele hola parte iha dezenvolvimentu, liliu ba iha atividades sosial, kultura, politika no ekonomia iha dezenvolvimentu Timor Leste nian, ho razaun ida ne’e maka ita selebra loron mundial feto hamutuk ho ita nia grupu sira husi grupu joventude feto sira hamutuk ho parseiru husi Munisípiu Covalima no mos autoridade lokal sira iha ne’e” nia haktuir.
Jerente World Vision ne’e mos afirma Feto Covalima mos la’os hamrik iha kotuk deit, maibe sira mos avansadu ona oinsa maka bele komprende di’ak sira nia direitu iha momentu ida hanesan ne’e.
Feto sira ne’ebe avansadu maka promove sira sai hanesan lideransa iha suku, oinsa maka promove Juventude sira sai lider ba nia maluk sira iha komunidade nia let.
Durante ne’e World Vision fo formasaun ba grupu joventude sira sai lideransa ne’ebé maka di’ak ba iha sosiedade ho mos sai lideransa ne’ebé di’ak ba iha nia kolega joven sira seluk ne’e maka fo ona formasaun ba sira bazeia ba Igualdade jeneru.
Nia relata formasaun ne’ebé World Vision kobre maka hanesan iha Postu Administrativu Tilomar, Maukatar, no Zumalai iha Suku 16, aldeia 97.
Jerente World Vision afirma durante ne’e World Vision la’os servisu mesak maibe serbisu hamutuk ho rede referal hotu oinsa maka promove feto sira sai lideransa ne’ebé maka di’ak, oinsa maka sira bele komprende di’ak igualidade ba jéneru no mos atu redus konflitu iha komunidade nia let liliu hasoru feto inklui redus violensia domestika iha uma laran.
“Tempu ona ita atu hapara violensia iha ita nia komunidade ho sosiedade sira liliu hahu uluk husi ita nia uma kain” nia afirma.
Sekretaria Munisípiu Covalima, Fransisco da Costa Alves, orgullu World Vision organiza hamutuk ho autoridade sira iha Covalima hodi selebra loron mundial ba feto ninian.
“Hanesan autoridade lokal sente agradese no orgullu tebes ho eventu ida ne’e, ne’ebé organiza husi World Vision mai hamutuk ho ita nia inan feton sira, autoridade lokal sira, funsionáriu sira hodi selebra loron mundial ba feto ninian, iha loron ida ne’e importante tebes ne’ebe ohin iha mensajem lubuk ida fo korazen nafatin ba inan feton sira atu involve iha dezenvolvimentu iha pais ida ne’e” nia informa.
Sekretariu Munisípiu Covalima esplika, ligadu ho politika oitavu governu nian katak sei la husik ema ida iha kotuk maibe hotu hotu avansa hamutuk hodi dezenvolve rai ida ne’e.
Entertantu partisipa iha komemorasaun loron mundial feto ne’ebé organiza husi World Vision iha Munisipiu Covalima hetan partisipasaun husi Sekretaria Munisípiu Covalima, PNTL Munisípiu Covalima, Administrador Postu Administrativu sira, xefe suku sira, Centru Comunidade Covalima, Pradet, grupu feto sira inklui Madre sira.
Jornalista : JS
Editor : CN
