COVALIMA RCCT- (09-03-2021) Relasiona ho Noticia ne’ebe publika iha Link RCCT iha Média Sosiál konaba Ahi han Komunidade Joanico Barreto nia residênsia iha Suku Tashilin Aldeia Kuluoan, maka Segunda feira (08-03-21), equipa husi Protesaun Civil Munisipio Covalima ho CVTL hamutuk ho EKSES-COVID-20 apoio ona sasan necesidades basikas ba familia vítima ne’e.
Lee Notisia Relevante: Akontesemento Ahi Han Uma iha Suco Tazilin Aldeia Kulu Oan, Vitima Joanico ho nia familia salva deit Ropa iha Isin Lolon.
Cordenador Protesaun Civil Munisipio Covalima Benjamin Amaral ba Jornalísta RCCT hateten, sasan ne’ebe sira apoio ba vítima mak hanesan, Fos Saka 3, sedaap kaisa 4, no Bimoli masa ida, inklui sasan ne’ebe la’os ai-han.
“ Ami Protesaun Civil hamutuk ho CVTL ho EKSES-COVID20 iha Covalima, ami lori sasan Food Item ho Noun Food Item, hanesan Fos saka 3, sedaap kaixa 4, Bimoli Massa ida, no bua ne’ebe maka laos Aihan, ami apoio ona ba familia vítima ne’e ” Benjamin dehan iha Aldeia Kuluoan.
Benjamin Amaral ne’e dehan, Equipa husi Protesaun Civil Covalima sei foti dadus hirak ne’e, hodi haruka ba nasional atu nune’e komunidade afetado bele hetan apoio material konstrusaun nian.
“ Ami sei foti dadus haruka ba Nasional para sira bele fo apoio ba familia vítima ne’e, atu nune’e sira bele hetan mahon di’ak fali, maibe apoio ida ne’e ita labele protemete tamba ita hasoru hela desafios Covid-19 nian ” Cordenador Protesaun Civil Benjamin Amaral Informa.
Iha fatin hanesan Familia Vítima Joanico Barreto hateten maske hetan ona apoio humanitaria maibe nafatin sei triste tamba mahon ne’ebe nia hela ba la iha ona.
“ Hau sente triste nafatin maske hetan ona apoio humanitarian, tamba ami nia mahon ne’ebe ami hela ba la iha ona, ne’ebe hau husu ba equipa ne’ebe maka apoio humanitarian mai ami, bele hato’o ba nasional hodi nune’e ami bele hetan tulun netik husi nai ulun sira ” Joanico Amaral informa ba Jornalista RCCT.
Entertanto ahi han Joanico Barreto nia residênsia iha loron Sabado (06-03-2021) mais ou menus tuku 7 kalan, ne’ebe impaktu husi Eletrisidade (Sirkuito).
Jornalista : Tynho Gusmão
Editor : Chamot Nahac
