Covalima (RCCT) 22-01-25-Vitima dezastre naturais iha Munisipiu Covalima ba periode 2024 hamotuk uma kain 726 hetan ona apoiu emerjensia husi governu liu husi Servisu Munisipal Protesaun Sivil no Jestaun Dezastre Naturais (SMPSJDN).
Diretór Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima, João Martins hatete familia afetadu ba dezastre naturais iha covalima hetan ona apoiu emerjensia ho tipu ai han no la’os ai han.
“Iha tinan 2024 SMPSJDN apoiu emerjensia ai han no la’os ai han ba komunidade afetadu ka familia uma kain-726, ne’e husi Servisu Munisipal Protesaun Sivil no Jestaun Dezastre Naturais maka apoiu ba iha familia afetadu, dezastre inundasaun, ahi han uma, ho tan rai hala’i” Diretór Servisu Munisipal Protesaun Sivil no Jestaun Dezastre Naturais (SMPSJDN), Munisipiu Covalima, João Martins, informa.
Nia mos relata inisiu Janeiru 2025 nian Servisu Munisipal Protesaun Sivil no Jestaun Dezastre Naturais rejista vitima inundasaun hamutuk familia uma kain 27.
“Iha fulan Janeiru 2025 nia laran ne’e ita rejista ona vitima hamutuk familia uma ka’in-27 hetan ona apoiu emerjensia husi Servisu Munisipal Protesaun Sivil no Jestaun Dezastre Naturais iha fula ida ne’e nia laran” nia dehan.
Entertantu João Martins, apela ba komunidade tomak iha Covalima atu hari uma tenki dok husi fatin risku dezastre ne’ebé Servisu Munisipal Protesaun Sivil no Jestaun Dezastre Naturais hamotuk ho Autoridade Protesaun Sivil taka ona avizu.
Jornalista : Julio Salinas
Editor : Chamot Nahac
