Covalima (RCCT) 16-01-25-Veterano, Manuel Barboza Pina “Mameran” lidera Veteranu sira iha Munisipiu Covalima hodi halo asaun protesta ba lista edital veteranu rejistradu 2009 ne’ebé publika husi Ministériu Kombatente Libertasaun Nasionál ataves de Konsellu Kombatente Libertasaun Nasionál iha loron 15 fulan janeiru 2025.
Mameran hatete organiza halo asaun protesta hasoru konsellu veteranu, basa konsidera lista edital 2009 ne’e lajustu tanba ema ne’ebé uluk involve luta ho duransaun tempu naruk maioria hetan deit pensaun 3 a7 maibe sira ne’e uluk lakohi ukun rasik an hetan pensaun 8 a 14.
“ Hare ba ema ne’ebé ami la kuñese bele sa’e ba 8 a 14, maibe ema ne’ebé terus na’in, ema ne’ebé maka hetan violasaun husi inimigu, ema ne’ebé iha estrutura laliu hotu, ne’e maka ami nia sentimentu ladi’ak, ne’e maka ami halo greve, ami halo asaun para mai atu husu ami nia fixa para ami hodi klarifika ida liu ne’e nia modelu oinsa, ida laliu ne’e tanba sa, husu ba konsellu veteranu munisipal nune’e halo klarifikasaun ba ami bazeia ba sa ida mak ema ne’ebé uluk la halo funu maibe nia naran tama iha lista hetan 8 a 14 maibe ema ne’ebé halo funu nia naran tama iha lista 3 a 7 no partisipasaun funu tinan 2 resin de’it” Manuel Barboja Pina “Mameran” hato’o lamentasaun ne’e iha edifisiu Konsellu Kombatente Libertasaun Nasional Munisipiu Covalima iha Aldeia Tabako-lot, Suku Debos, Postu Administrativu Suai Kinta (16/01).
Notisia Relevante :https://www.rcct.tl/diskunfia-eis-milisia-mahidi-nain-3-naran-tama-lista-veteranu-husi-kaixa-laku-zona-zumalai/
Nune’e mos Veternu Apolonario Gondinho Maia “Ahi Dubun” hatete presiza halo klarifikasaun tanba lista kombatente libertasaun Nasionál ne’ebé publika hakanek veteranu sira ne’ebé uluk luta hodi se’i karas ba inimigu.
“Ami la satisfas tanba ema ne’ebé uluk luta ba rai ida ne’e nia naran la iha maibé ema ne’ebé la partisipa funu nia naran iha ida ne’e ami preokupa, tan ne’e husu ministériu presija hare problema ne’e ho urjente” nia informa.
Sekretáriu Konsellu Kombatente Libertasaun Nasional Munisipiu, Juaquim Barros “Sikat Let” dehan Konsellu Kombatente Munisipal publika lista edital rejistafu 2009 ne’e bazeia orientasaun husi Ministériu Asuntu Kombatente Libertasaun Nasionál.
“Kuaze hotu-hotu halo reasaun tanba la satisfas ho rezultadu publikasaun edital rejistu 2009 ni’an, no prosesu konaba validasasun primeiru ekipa sira mai halo verifikasaun hotu faze ida ba validasaun, ne’e komisaun sira reprezenta rejional, reprezenta komisariu ho sub rejiaun ne’e maka ninia papel ne’e to’o iha verifikasaun suku deit ona, maibe kontinuasaun ba iha ne’e laiha ona la involve ekipa sira ne’e maibe entrega deit ba iha diresaun nasional, ne’ebé ida ne’e tuir munisipiu nia hatene ami la involve iha ne’eba, depois verifikasaun hotu rezultadu lori ba iha nasional ami hein rona deit momentu asina akta mai ninia numeru maka mai hanesan ita hotu hatene numeru ida ne’ebé fo sai ida ne’e maka mai ami la hatene”Sikat Let esplika.
Entertantu ho asaun ne’ebé veteranu sira hala’o iha edifisiu Konsellu Kombatentes Libertasaun Nasional Munisipiu Covalima ho razaun, la konkorda ho lista edital veteranu rejistu iha 2009 tanba realidade hatudu ema sira ne’ebé uluk luta ba rai ida ne’e hetan deit pensaun 3 a 7 no maibe ema sira ne’ebé involve iha luta ba ukun rasik an hetan fali pensaun 8 a 14. Enkuantu tuir dadus ne’ebé rejista iha 2009 Covalima hamutuk ema na’in 9.939.
Jornalista : Julio Salinas
Editor : Chamot Nahac
