Covalima (RCCT) 10-06-2026-Komunidade Aldeia Halik, Suku Beko, Postu Administrativu Suai Seidauk asesu ba Eletrisidade deste Timoe-Leste hetan nia Independensia ate agora, tanba ne’e habitante aldeia Halik sente duvidas.
Habitante Aldeia Halik Domingos Viegas Morales Monis hateten ami aldeia halik deste Timor-Leste hetan nia ukun rasik aan ate a data seidauk asesu ba eletrisidade no ami la hatene tanba saida mak iha suku beko aldeia 11 (sanulu resin ida) aldeia 10 (Sanulu) mak asesu ba eletrisidade no ami aldeia halik la bele asesu ba eletrisidade iha era independensia ida ne’e.
Ha’u konfuzaun uitoan ba ami nia eletrisidade, iha ami nia suku iha aldeia 11 (sanulu resin ida) aldeia 10 (Sanulu) mak ahi lakan hotu ona no uniku ami nia aldeia deit mak ahi seidauk tama, no ami kontente uitoan tanba iha tinan 2025 sira hatun ona Ai-rin eletrisidade maibe no fim to’o agora seidauk realiza to’o agora, ami la hatene tuir bainhira mak atu lakan, durante ne’e ami hein ba hein to’o agora seidauk tama de’it.” Domingos Viegas Morales Monis, relata.
Xefe Suku Beko Arlindo Bernarlindo Lemos mos relata katak Aldeia Halik la asesu eletrisidade deste Okupasaun Portugueza no Indonesia to’o mai ita hetan restaurasaun independensia ba dala 24 ona maibe seidauk asesu nafatin ba eletrisidade.
Iha tinan 2025 Suku Beko hetan oportunidade ida ba eletrisidade ne’e husi Aldeia Maukola ba to’o Tobur remata ona sira asesu hotu ona no mos Holbolu ba iha Dilu Hilin mos asesu ona depois ida Sentru ba iha Halik ne’e mak to’o agora seidauk asesu ba eletrisidade, ne’ebe nia problema ne’e mais ou menus iha ne’ebe ami mos la dun hatene, tuir ami nia hare katak Kompaña mak abandona servisu ne’e, tanba ne’e mak karik bele ami husu ba EDTL atu aselera lalais ninia prosesu ne’e hodi komunidade bele asesu ona eletrisidade ne’e iha tempu badak, iha parte balu mos ha’u hakarak hatete katak ami mos rejolve ona problema balu ami lori karta husi suku ba ona iha EDTL maibe to’o agora ninia rejultadu ne’e mak ami seidauk hatene no depois to’o agora komunidade sei nafatin iha nakukun laran, komunidade iha parte Aldeia Halik sira triste tebes tanba iha Suku Beko ne’e uniku Aldeia Halik de’it mak seidauk asesu ba liña eletrisidade. Empreza ida ne’ebe mak toma responsabilidade eletrisidade ba Aldeia Halik nian ne’e mak Kompaña ida mak naran Laliva, Unip.Lda, komesa husi tinan 2025 hahu husi Janeiru mai to’o iha Dezembru mos la remata ne’ebe ami konsidera ida ne’e hanesan abandona tanba ne’e mak ami hakarak rekomenda atu prosesa lalais oinsa atu komunidade ne’e bele sente iha tempu badak.” Arlindo Bernarlindo Lemos, haktuir.
Total populasaun Aldeia Halik iha Xefe da Familia Nen Nulu Resin no mos komunidade iha Atus Tolu Resin iha ne’eba mak seidauk sente naroman husi era independensia, no distansia husi Centru ba Aldeia Halik ne’e mais ou menus 3 Kilo Metrus la dok husi Centru Suku Beko, Postu Suai, Munisipiu Covalima.
Jornalista Paul Mandeu
