COVALIMA—-Komunidade agrikultor sira husu governu liu husi Ministeriu Agrikultura no Peskas atu tau planu hodi apoiu tan trator mai iha Munisipiu Covalima tanba ho trator ne’ebe iha oras ne’e daudaun barak maka avaria tanba ladun halo manutensaun ho seriu.
To’os na’in Emilio Gabriel, husi Aldeia Mukbelis, Suku Labarai, Postu Administrativu Suai, husu ba Ministériu Agrikultura no Peska atu bele tau planu hodi apoiu tan trator unidade-20 hanesn ne’e mai iha Covalima atu nune’e komunidade ba futuru labele hadau malu trator hodi fila sira nia to’os, tanba oras komunidade barak maka sei dauk fila sira to’os.
“Ami komunidade moris hanesan vida agrikultor husu nafatin ba iha governu liliu ba iha Ministériu Agrikultura no Peska atu bele ajuda tan trator boot ne’e-10 ou to’o 20 para ami bele hetan hotu trator hodi fila ami nia to’os, tanba agora atu tama ona ba tempu udan maibe to’os barak maka seidauk fila tanba trator fage lato’o” nia informa ba jornalista sira iha Centru Manutensaun Trator Aldeia Sanfuk, Suku Kamanasa, Postu Administrativu Suai, Tersa (14/03).
Hatan ba preokupasaun to’os na’in sira nian kona-ba trator tuir Xefe Brigada Centru Manutensaun Trator Sanfuk, Munisípiu Covalima, Tomas Amaral, trator ne’ebe komunidade sira presija atu hodi fila sira nia to’os oras ne’e sei diak hodi halo hela operasaun ba fila komunidade nia to’os maka trator sei diak ne’e hela unidade-17 no trator unidade-13 oras ne’e avaria total.
“Total trator iha Covalima hamutuk unidade-30 kompostu husi postu administrativu Suai, Tilomar, Maucatar no Zumalai, maibe husi trator unidade–30 oras ne’e daudaun hela deit trator unidade-17 mak sei diak hodi hala’o serbisu fila komunidade sira nia to’os, restu husi ida ne’e maioria avaria total” nia deklara.
Enkuantu komunidade sira ne’ebe kada loron sempre ba halo rejistu iha Centru Manutensaun Trator Sanfuk loron ida bele to’o ema na’in-40 resin, maibe trator atu fila rai iha Centru Manutensaun Trator Sanfuk hamutuk unidade-30, maibe trator unidade-17 sei diak no trator ne’ebe at la utiliza ona hodi fila komunidade nia to’os hamutuk unidade-13 tanba ladun halo manutensaun ho seriu ministeriu relevante.(Azu)
