Covalima (RCCT) 22-03-25- Eis Xefe Estadu Maiór das FALINTIL, Jenerál Taur Matan Ruak (TMR) sabadu fim de semana ne’e hala’o dialogu ho veteranu Munisipíu Covalima, hodi buka soluasau ba probelma veteranu sira liuliu veteranus rejistu 2009 ne’ebé hamosu polémika tanba konsidera hetan diskriminasaun hosi Governu atual.
Iha diálogu ne’e, Eis Gerileiru FALINTIL loke diskusaun hodi rona preokupasaun husi Veteranu sira liliu liga ba lista edital veteran rejistu 2009 ne’ebé hamosu diskriminasaun ba direitu veteranu sira nian.
“Objetivu mak sensiviliza sira konaba problema veteranus nian problema ida ne’ebé ohin loron ema hotu preokupa no sai problema nasional, entaun sensibilizasaun ne’e ba sira konaba problema ne’e la’o oinsa?, nia kauza ne’e maka ida ne’ebé, konsekuensia maka ida ne’ebé? no solusaun mak saida no pasu saida mak ita hari porque ita hetan solusaun sira ne’ebé ita hotu hotu manan estadu mana mos nasaun manan no mos veteranus sira mos menan” Eis Xefe Estadu Maiór das FALINTIL, Jenerál Taur Matan Ruak, konfirma.
Eis Xefe Estadu Maiór das FALINTIL, Jenerál Taur Matan Ruak, afirma, governu tenta rejolve veteranu sira nia problema maibe seidauk hetan solusaun ida ne’ebé di’ak tanba sei nafatin mosu diskriminasaun no laiha sustentabilidade ba veteranu sira.
“Naverdade tinan hira ne’e ita halo esforsu bo’ot, goverenu ida ba governu ida tenta resolve maibe to’o ohin loron hetok kontinua iha aumenta tan, ne’e signifika katak solusaun ne’ebé ita fo ne’e la’os solusaun ida ne’ebé di’ak. Entaun ita tenki buka dalan atu hetan solusaun ida ne’ebé di’ak liu tanba problema ne’e iha rua, ida diskrimina ema, rua la iha sustentavlidade. Sustentablidade ne’e ita ko’alia liu konaba osan ne’ebé fo subsidiu ba veteranus sira, ita hanoin veteranu itoan mai veteranu barak liu kuandu barak osan la to’o ita komesa tun, segundu diskriminasaun, tanba osan la to’o ita labele hare hotu hotu, por exemplu 0-3 la simu, 4-7 simu dala ida deit, 8-14 mak simu fulan fulan, 15-19 mak simu fulan fulan no 20-24 mos hanesan simu fulan fulan, entaun deskontentamentu ne’e iha no Insatisfasaun ne’e iha” Taur Matak Ruak, esplika.
Veteranu Munisipiu Covalima hato’o agradesimentu ba Eis Xefe Estado Maiór Jenerál FALINTIL, Taur Matan Ruak, embora la ukun maibe iha vontade hanesan lider nasional buka halibur veteranu sira hodi fo idea no motivasaun atu nafatin firme hodi luta ba direitu.
Entretantu dialogo ne’e hala’o iha otel vida nova suai, partisa husi veteranu sira ne’ebé mai husi Postu Administrativu hitu ne’ebé partense iha Munisipiu Covalima.
Jornalista : Alfredo Barreto
Editor : Chamot Nahac
