Covalima (RCCT) 26-02-25-Falta fulan 6 hodi kompleta ba tinan 5, Rai no Fatuk Hakoi Auto Estrada iha KM5 Area Suku Debos no Ogues. Rai no Fatuk Monu Taka metin Auto Estrada ne’e hahu kedas iha Mandatu Governasaun da ualu (VIII) iha fulan Augusto 2020, Rai no fatuk monu, hakoi alkatraun Auto Estrada nian iha Kilo Metru lima (KM5) area Suku Debos no Suku Ogues, to’o agora governu liu husi Instituisaun Jestaun Ekipamentu (IGE-Sigla Portuguesa) Ministeriu Obras Publika seidauk ra’ut rai no dudu sai fatuk iha dalan klaran tanba laiha ekipamentu utiliza hodi harahun fatuk bo’ot.
Notisia Relevante : https://www.rcct.tl/impaktu-husi-udan-inundasaun-fatuk-no-rai-taka-metin-auto-estrada-iha-suai/
Nune’e Diretór Servisu Munisipal Obras Publika no Transporte (SMOPT) Munisipiu Covalima, Sidonio Gusmão informa iha governu da sia ne’ebé lidera husi Primeiru Ministru Kay Rala Xanana Gusmão fo atensaun ba estrada hotu iha teritoriu laran tomak inklui Auto Estrada, tanba ne’e ekipa tekniku sira halo ona observasaun ba rai no fatuk monu taka Auto Estrada, maibe seidauk iha ekipamentu ne’ebé sufisiente atu hodi harahun fatuk no ra’ut rai ne’ebé taka metin Auto Estrada ne’e.
“Iha mandatu nonu governu ne’e ita fo atensaun ba estrada inklui ho auto estrada, saida maka ita esforsu halo ona pedidu ba Ministru Obras Publika ho prezidente IGE para atu fo atensaun sai rai maten ne’ebé monu taka metin auto estrada ne’e, ita konfirma ona sira nia tekniku sira mai hamutuk ho obras publika hare direita, depois sira hare no sira mai tanba ekipamentu balu la sufsiente para atu fera rai ne’ebá hodi harahun fatuk bo’ot sira tanba ne’e maka la konsege dudu ka raut sai rai ne’ebé taka metin auto estrada kuaze tinan barak ona, maibe ita kontinua tenta nafatin para bele resolve auto estrada ne’e” Diretór Servisu Munisipal Obras Publika no Transporte (SMOPT) Munisipiu Covalima, Sidonio Gusmão.
Maske nune’e SMOPT kordena bebeik ona ho IGE atu dudu sai rai maten ne’ebé monu hakoi alkaltraun iha Auto Estrada to’o agora seidauk iha implementasaun.
“Ko’alia konaba bainhira maka atu dudu sai rai sira ne’e husi auto estrada, tanba posibilidade ne’e ita hare liu ba iha parte IGE nian, ita halo koordenasaun bainhira sira foin iha tempu maka atu bele dudu rai ne’ebá sai. Ita hein deit sira, ita kontinua tenta no sira mos ejiste ona iha Covalima ita halo koordenasaun para sira bele hasai rai maten ne’ebé taka metin hela auto estrada” hatete Sidonio.
Enkuantu Diretór Servisu Munisipal Obras Publika no Transporte (SMOPT) Munisipiu Covalima, Sidonio Gusmão, hatete iha mandatu governu dasia ne’e liu husi Servisu Munisipal Obras Publika no Transporte (SMOPT) nafatin tenta hodi halo kordenasaun bebeik ho IGE, atu bele aselera lalais hodi dudu sai rai maten no fatuk ne’ebé monu taka tomak Auto Estrada KM5 iha area suku Debos no Suku Ogues.
Jornalista : Julio Salinas
Editor : Chamot Nahac
