COVALIMA—-Pontu Fokal Ra’es Hadomi Timor Oan (RHTO) Munisípiu Covalima, Rosito Amaral, hatete tinan kotuk RHTO tun ba iha Suku Zulo, Postu Administrativu Zumalai, no ba iha Eskola Bazika Central Suku Suai-Loro hodi hala’o ona sosializasaun kona-ba Inkluzaun no difisiénsia.
“Iha tinan kotuk ami hala’o sosializasaun iha Suku Zulo, Postu Administrativu Zumalai hetan partisipasaun masimu husi lider komunitaria, Konsellu suku, komunidade Inklui maluk difisiénsia sira, no mos ami hala’o sosializasaun iha eskola baziku central Suku Suai-Loro ne’e halo sosializasaun ba manorin na’in no estudante no maluk difisiénsia sira ne’ebe durante ne’e hala’o hela estudu iha eskola refere, objetivu husi sosializasaun ne’e atu hasa’e konsiensia lider komunitaria, komunidade no manorin na’in nian n kona-ba Inkluzaun no difisiénsia” informa Pontu Fokal Ra’es Hadomi Timor Oan (RHTO) Munisípiu Covalima, Rosito Amaral, ba jornalista sira iha Bairro Rompe, Suku Debos, Postu Administrativu Suai, Segunda (20/03).
Nia afirma objetivu prinsipal husi sosializasaun ne’e atu hasae konsiensia lideransa komunitaria, komunidade no ba manorin na’in sira iha eskola.
“Obejtivu sosializasaun ne’e atu hasae konsiensia ba ita nia lider komunitaria, ba komunidade kona-ba inkluzaun difisiensia no mos ba iha eskola atu hasae konsiensia ba manorin na’in sira oinsa atu atende maluk difisiénsia sira ne’ebe durante ne’e eskola iha iha fatin refere” nia dehan.
Nia afirma antes atu halo sosializasaun RHTO mos halo uluk verifikasaun iha eskola refere ema ho difisiénsia iha ka lae, maibe hafoin halo verifika konsege hetan duni ema ho difisiénsia mos eskola iha ne’eba maka RHTO hala’o sosializasaun, atu nune’e bele fahe informasaun kona-ba direitu ema ho difisiénsia bele asesu ba eskola.
Pontu Fokal RHTO Munisípiu Covalima mos kestiona kona-ba fatin iha eskola no sede suku ladun asesivel ba maluk difisiénsia asesu ho diak tanba laiha rampak ka dalan ba maluk sira difisiénsia sira ladun diak no sintina sira mos ladun asesivel na maluk difisiénsia atu bele asesu.
“Durante halo sosializasaun kona-ba dezafius ne’ebe hau haree ho matan hanesan iha sede suku no eskola hau haree fatin maka ladun asesivel ba ita nia maluk difisiénsia sira atu asesu ba eskola no mos ba iha sede suku atu trata dokumentus ruma tanba laiha rampak, laiha hand real no mos iha eskola ita haree liliu ba iha fatin kazadebanu la asesivel ba ita nia maluk difisiénsia sira atu asesu, ba sede suku mos kazadebanu laiha rampak atu ita nia maluk difisiénsia bele asesu” nia haktuir.
Rojito rekomenda ba lider komunitaria sira no ba diretor Edukasaun Munisípiu Covalima atu bele tau planu hodi hadi’a fatin atu nune’e ema ho difisiénsia mos bele asesu ho diak liliu ba iha fasilidade publiku sira liliu ba iha eskola no sede suku sira.
Entertantu sosializasaun ne’ebe RHTO hala’o iha Suku Zulo no iha eskola baziku central Suku Suai-Loro iha tinan 2022.(Azu)
