COVALIMA—-Durante tinan tomak ida nia laran hahu husi fulan Janeiru to’o Dezembru 2022 Polísia Nasionál Timor-Leste (PNTL) liu husi Unidade Ema vulneravél (PNTL-VPU) Covalima, rejista kazu hamutuk 52, husi kazu hirak ne’e kazu as liu mak violénsia doméstika (VD) no kazu abuzu sexual.
Xefe Investigasaun PNTL-VPU Covalima, Primeiru Sarjentu Amelia de Jesus Amarál relata, PNTL–VPU rejista kazu 52 husi númeru ne’e , kazu violénsia doméstika kontinua aas ho númeru 22 no kazu abuzu sexual ba menoridade hamutuk-9 iha Munisípiu Covalima.
“Hahu fulan janeiru to’o dezembru tinan 2022 PNTL-VPU Covalima rejista kazu hamutuk-52 iha suku 30 , husi númeru ne’e, kazu violénsia doméstika kontinua as hamutuk-22 no kazu abuzu sexual ba menór hamutuk-9” informa Primeiru Sarjentu Amelia de Jesus Amarál, ba jornalista sira, iha bairro Rompe, suku Debos, Postu AdministrativuSuai, kuarta (04/01).
Nia dehan ba autór sira ne’ebé mak komete kazu refere, VPU halo ona investigasaun no prosesu ba iha Ministériu Públiku (MP) hodi prosesa kazu ba tribunal distrital Suai hodi halo julgamentu.
“Hafoin PNTL-VPU Covalima haruka prosesu kazu sira ba Ministériu Públiku ami bele akompañia to’o iha tribunal maibé ami kolobora ho ONG ALFELA, Fokupers no Uma mahon Salele mak akompañia lezada sira to’o iha prosesu julgamentu.
Nia afirma PNTL-VPU Covalima rejista kazu 52 ho nia tipu sira hanesan, kazu violénsia domestika 22, abuzu seksuál ba menór 9, aktu seksuál ba adulesente 6, maustratu ba konjuge 3, ezebionismu 2, violénsia sexual ba ema la resiste 2.
Kazu violénsia sexual 2, koasaun sexual 1, tentativa violénsia sexual ida (1), ameasa ida (1), pornografia ba infantil ida (1), violénsia ba ema ho difisiénsia ida (1) no kazu abandona ida (1).(Azu)
