Covalima (RCCT) 30-12-24-iha loron 28 fulan Dezembru 2024 hale’u oras tuku 5:30 resin lorokraik tekniku EDTL.EP Covalima ho naram Fernando Amaral hetan asidente ho kareta soke uma lisan Manu Uman Fau Lulik iha Suku Suai-Loro, hafoin simu orientasaun husi Xefe Unidade Anorito Mendonça, atu halo koneksaun liña eletrisidade iha fider-3 diresaun Zumalai nian ne’ebé falla iha momentu ne’eba.
Anorito Mendonça, rekuñese molok akontesementu nia parte maka fo orientasaun ba tekniku refere atu halo atendimentu iha terenu, nune’e liga ba insidente Kareta soke tohar airin Uma Lisan Fau Lulik iha suku suai loro ne’e, parte rua EDTL,EP no Lia na’in sira iha ona konkordansia hodi dada sai kareta EDTL,EP nian ne’ebé iha Uma okos no EDTL.EP Covalima sei responsaveliza hadi’a Uma lisan Fau Lulik.
“Sim iha akonteseimentu ne’e nia ba hetan orientasaun duni husi ha’u maka orienta ba hatama ahi ba fider-3 jalur ba Zumalai nian, nia sai husi uma ba hetan duni asidente ida ne’e, konaba uma lisan ne’e rasik ohin ami halo akordu ona husi parte uma na’in no parte EDTL.EP maka kareta dada ona mai EDTL.EP Covalima” Xefe Unidade EDTL.EP Munisipiu Covalima Anorito Mendonça, Informa.
Nia dehan kona ba prosesu atu hadi’a uma lisan refere parte EDTL.EP Covalima hein deit informsaun vitima ka uma na’in.
Notisia relevante : https://www.rcct.tl/kareta-edtl-ep-soke-uma-lisan-munu-uman-fau-lulik-iha-suku-suai-loro/
“Konaba prosesu ba oin parte EDTL.EP Covalima hein deit rezultadu tanba iha ona akordu entre Staff ne’ebé hetan asidente ho parte vitima, ida ne’e maka sira sei prosesa hela, ne’ebé EDTL hein deit rezultadu husi staf ne’ebé hetan soke ne’e, ne’ebé ami hein informasaun husi nia, ami mantein nafatin atu apoiu nafatin ba desizaun ne’ebé sira foti” nia informa.
Entertantu Xefe Unidade EDTL.Ep Munisipiu Covalima Anorito Mendonça afirma hafoin parte rua iha konkordansia maka EDTL,EP foin dada sai Kareta husi uma okos hodi ba asegura iha edifisiu EDTL Covalima iha Mata Air, Debos Suao.
Jornalista : Julio Salinas
Editor : Chamot Nahac
