Covalima (RCCT) 28-09-23–Suku 14 Iha Munisipiu Covalima maka seidauk estabelese Konsellu Polisia Komunitaria (KPK), maibe fiar katak ho eleisaun suku ne’ebé sei akontese iha fulan Outobru tinan ne’e remata bele estabelese ona KPK iha suku sira ne’ebé seidauk estabelese.

Komandante PNTL Munisipiu Covalima, Superientendente Polisia, Calisto Gonzaga, hatete nia parte sei hein xefe suku eleitu mai ne’e mak foin bele estabelese KPK, relasiona ho leitura ne’ebé Komandu Jeral halo ona konaba KPK ninian.

“Iha nivel Munisipiu Covalima ita sei iha suku 14 maka seidauk estabelese KPK, loloos ha’u nia prezensa mai iha ne’e bele estabelese hotu ona, maibe hau hein depois xefe suku eleitu ne’e iha ha’u bele kompleta tanba sira husi nasional halo leitura balu konaba KPK sai dekretu ida para atu bele sai hanesan regulamentu ida orienta hela ita, mata dalan ba ita nune’e ita nia maluk sira enkuadra an ba iha KPK mos pelumenus buat balu ita konsidera” informa Komandante PNTL Munisipiu Covalima Superientendente Calisto Gonzaga ba jornalista sira iha Salaun Igreja Ave Maria Suai Kinta ne’e.

Komandante ne’e afirma membru KPK mai barak di’ak liu tanba haree ba esperiensia ne’ebé iha ona, maibe presija mos involve grupu balu iha suku liliu hare ba juventude feto, veteranu pelumenus ema bele to’o na’in-15 hanesan ne’e hodi reprezenta suku.

“KPK depende ita nia esperiensia barak diak liu, maibe ita mai pelumenus ho grupu balu iha suku, ezemplu hanesan juventude feto, veteranu nian no mos ema ne’ebé iha meritu purvolta ema bele to’o na’in-15 hanesan ne’e hodi reprezenta husi nivel suku nian” nia dehan.

Entertantu oras ne’e daudaun iha Covalima hela deit ona suku 14 maka seidauk estabelese KPK maibe komando nia planu sei estabelese bainhira eleisaun suku remata no xefe suku eleitu sira bele hala’o ona servisu ho loos ona foin bele estabelese.

Jornalista : JS

Editor : CN