Covalima (RCCT) 09-05-23, Diretór Sekretariadu Tékniku Administrasaun Eleitorál (STAE) Munisipiu Covalima, Francisco Gusmão, hatete STAE liu husi brigada sira halo ona identifikasaun ba sentru votasaun (SV) sira, konsege hetan sentru votasaun kuaze 20 resin maka eletrisidade latama maibe pedidu hato’o ona ba munisipiu.
“Iha ami nia pedidu ne’ebe alista ona ba iha ita nia adminostrador munisipiu, iha ne’eba ita identifika sentru votasaun rua nulu resin, maibe depois de ita halo identifikasaun klean liu husi ita nia ekipa brigada sira kada sentru votasaun ida-idak indentifika SV kona-ba ida ne’ebe maka laiha eletrisidade, ida ne’ebe maka fiu metan yama tiha ona, ida ne’ebe maka sei dauk instala fiu sira ba iha sala de sentru votasaun, tanba ne’e liu husi enkontru ida ohin ne’e ota kontinua hato’o nafatin munisipiu no direota ba iha Diretór EDTL.EP Munisipiu Covalima” informa Diretór STAE Munisipiu Covalima Francisco Gusmão ba jornalista sira hafoin remata enkontru divulkasaun kona-ba prosesu eleisaun parlamentar 2023, ne’ebe organiza husi STAE Munisipiu Covalima, Tersa (09-05).
Nia dehan liu husi pedidu hetan ona ninia rezultadu kona-ba sentru votasaun sira ne’ebe ahi sei dauk lakan, sira komesa instala daudauk ona, depois sentru votasaun sira ne’ebe fiu metan seidauk tama EDTL.EP komesa liga daudauk ba ona.
Hatan ba kestaun ne’e Diretór EDTL.EP Munisipiu Covalima Alexander Seran, hatete parte tékniku EDTL sira oras ne’e preparadu ona atu halo instalasaun ahi ba sentru votasaun sira ne’ebe ahi sei dauk tama ne’e.
“Hau hanoin ami nia orariu klaru ona ba eventu ida ne’e, no hau nia tekniku sira preparadu ona, ba ita nia ekipamentus sira mos sufsiente ba ami, tanba transporte iha lima, motorizada iha unidade 8 inklui iha mos konbustivel atu hodu bele hala’o serbisu iha terenu,” nia dehan.
Nia afirma kona-ba eletrisidade parte EDTL prontu asegura ahi lakan 24 oras nia laran tanba ne’e hein atu hala’o serbisu tuir orariu ne’ebe maka iha.
Nia dehan parte EDTL simu tiha ona karta husi STAE kona-ba sentru votasaun balu maka ahi sei dauk tama tan ne’e tempu badak sei bele resolve hodi instala ahi ba sentru votasaun sira ne’ebe indentifika.
Nia sublina sentru votasaun sira ne’ebe ahi sei dauk tama ne’e maioria iha foho tuir lista ne’ebe mai husi STAE, ne’e maka EDTL sei instala lao tuir karta ne’ebe iha no fatin sira ne’ebe identifika ona.(JS)
