Covalima (RCCT) 26-10-23– Kinta Feira ohin Sekretariadu Tekniku Administrasaun Eleitoral (STAE) Munisipiu Covalima hahu uluk halo distribuisaun material sensitivu no la’os sensitivu eleisaun orgaun suku 2023, ba Postu Administrativu (PA) 4 mak hanesan Postu Administrativu Fatumea, Fohorem, Fatululik maibe PA Zumalai Foin distribui uluk ba Suku Lepo,Usecai no Mape, maibe Suku sira seluk sei kontinua hikas sexta feira aban hamotuk ho seluk iha PA Suai, Tilomar, Maukatar.
Administrador Munisipiu Covalima Francisco de Andrade, iha nia intervensaun husu ba STAE atu nafatin hatur prezensa ho imparsialidade hodi garatia no fo susesu iha eleisaun ba orgaun suku ne’e.
“Ita halo lansamentu primeiru distribuisaun ba material sensitivu no la’os sensitivu ba postu administrativu tolu, eleisaun ida ne’e uluk ita halo ona iha 2016, lei hirak ne’ebé iha sei ekivalensia nafatin lei ida 2016 ninian, tan ne’e ha’u husu ba ekipa tomak liliu STAE katak imi nia prezensa tomak iha ne’eba imi hanesan mos imparsialidade labele hatete ba kandidatu A ka B maibe imi nia foku oinsa eleisaun ida ne’e atu la’o ho di’ak, la’o ho susesu, maibe la’os ida ne’e deit, entidades hotu-hotu ne’ebé partensia ba suku ida, ne’e hotu-hotu nia responsabilidade, tan ne’e mak ho ita bo’ot sira nia esperansa tomak katak eleisaun ida ne’e iha ambitu demokrasia ne’ebé iha ita esperansa tomak nia la’o tenke ho pas, dame no estabilidade nia laran” informa Administrador Munisipiu Covalima Francisco de Andrade.
Administrador Munisipiu Covalima mos husu ba Diretór servisu munisipais sira hotu katak funsionariu sira ne’ebé mai husi postu sira ida-idak tenke koloka ona ba postu hodi apoiu Pesoal STAE Apoiu Suku no Pesoal STAE Apoiu Aldeia iha sentru votasaun sira.
“Ita mos hatene ona katak kondidatura ba ninia lideransa ida ne’e bo’ot liu, pruzemplu suku ida bele to’o ema na’in 8 ou 10 ne’e hatudu katak iha posibilidade atu bele tama iha segundu ronde, tanba ita adopta sistema ida dehan katak pursentu 50+1, tanba ne’e hotu-hotu tenke esforsu atu nune’e eleisaun ida ne’e bele la’o ho di’ak, ha’u husu mos ba Diretór munisipais sira hotu karik funsionariu sira ne’ebé mai husi postu atu ida-idak bele koloka ona ba postu nune’e bele apoiu staff sira husi STAE ne’ebé destaka ba iha sentru votasaun sira ba eleisaun ida ne’e” nia dehan
Diretór STAE Munisipiu Covalima Francisco Gusmão husu ba Pesoal STAE Apoiu Suku (PSAS) no Pesoal STAE Apoiu Aldeia (PSAA) inklui Ofisial Supervizaun Eleitoral husi Komisaun Nasional Eleisaun (CNE) atu kopera servisu iha sentru votasaun ka Aldeia sira ne’ebé destaka ba mak hetan segunda volta bele pasa kedas informasaun mai iha STAE Munisipiu.
“Ha’u hakarak fo hanoin ba Pesoal STAE Apoiu Aldeia ho Ofisial Supervizaun Eleitoral sira atu kopera servisu iha sentru votasaun sira, karik iha sentru votasaun aldeia ne’ebé mak hetan segunda volta ba xefe aldeia nian halo fabor fo kedas mensajem mai STAE Munisipiu nian atu nune’e bele lansa kedas informasaun ne’e ba iha nasional para prepara kedas ba eleisaun segunda volta nian, husu PSAA sira atu kontrola masimu ba atividades simu dokumentus husi kandidatura sira labele iha faillansu” nia husu.
Diretór Komisaun Nasional Eleisaun Munisipiu Covalima Hermenegildo de Sena, hatete CNE hanesan orgaun independente firme nafatin ho nia responsabilidade tan ne’e husu ba Ofisial Supervizaun Eleitora (OSE) sira labele abandona sentru votasaun sira ne’ebé imi destaka ba.
“CNE nudar orgaun independente firme nafatin ho nia responsabilidade hodi tau matan ba aktu hirak ne’e, tan ne’e husu ba Ofisial Supervizaun Eleitora (OSE) atu tau matan ba lala’ok hirak ne’e, husu ita bo’ot sira labele abandona sentru ka estasaun votasaun ne’ebé ita bo’ot pertensia ba, karik iha buat ruma maka la’o ladun loos karik husu ita bo’ot sira atu kopera ka komunika ho pesoal polisia kolokadu iha sentru votasaun ka estadaun votasaun atu nune’e buat sira ne’ebé ita hotu la gosta labele dezenvolve iha ne’eba” nia dehan.
Entertantu sermonia lansamentu distribuisaun material sensitivu no la’os sensitivu ne’e hala’o iha resintu Administrasaun Munisipiu Covalima, no iha loron dahuluk ne’e distribui uluk ba Postu Administrativu 4 Maibe Postu Zumalai Distribui uluk ba Suku 3, no Sesta aban sei kontinua distribui ba postu administrativu seluk iha Covalima.
Jornalista : Julio Salina
Editor : Chamot Nahac
