Covalima (RCCT) 20-10-23-Sekretariadu Tekniku Administrasaun Eleitoral Munisipiu Covalima simu lista kandidatura xefe suku iha Covalima hamutuk ema na’in-165, hafoin sira submete dokumentus ba meja eleitoral iha loron 13 fulan Outobru tinan ne’e iha ida-idak nia suku.

Diretór STAE Covalima Francisco Gusmão hatete iha prosesu simu dokumentus husi kandidatura suku sira ba periodu 2023-2030 iha loron 13 fulan ne’e, iha momentu ne’e kedas ekipa meja eleitoral transporta kedas ba postu administrativu ida-idak no no lori mai iha STAE Covalima hodi haruka fali ba iha nasional bele produs ba buletin suku orijinal ba eleisaun suku nian, tan ne’e kuantidade husi meja eleitoral suku iha suku 30 ne’e total kandidatura hamutuk ema 165.

“Iha prosesu simu dokumentus kandidatura ba xefe suku periodu 2023-2030, hahu iha loron 13 fulan Outobru 2023, iha prosesu simu dokumentus kandidatura ne’e hahu husi oras tuku 10 to’o tuku 1 meudia, iha momentu ne’e kedas sira husi ekipa meja eleitoral suku nian dokumentus sira ne’e transporta kedas ba postu ida-idak no sekuensia ba buletin votu ba kandidata suku nian ne’e maka ezemplu sira lori mai STAE munisipiu para bele halo SCAN ba sekuensia ba ba kandidatura suku ne’e ita hodi manda fali ba nasional atu nune’e sira husi grafik nasional bele produs ba buletin suku orijina ba eleisaun suku nian, kuandidade ne’e iha momentu husi ita nia meja eleitoral suku iha suku 30 ne’e total kandidatu hamutuk na’in-165, husi numeru kandidatura hirak ne’e feto hamutuk 16 restu mane hotu” informa Diretor STAE Covalima Francisco Gusmão ba jornalista sira iha nia kna’ar fatin STAE Covalima Sesta ne’e.

Diretór STAE ne’e dehan lista kandidatura ba xefe suku mai husi suku 30 iha Munisipiu Covalima maioria feto ne’ebé kandidata an ba suku hodi kompete ho mane sira iha eleisaun suku ne’e barak liu husi Postu Administrativu Tilomar iha Suku Lalawa no Maudemo.

“Tuir ita nia lista ne’ebe iha feto kandidata an ba eleisaun suku 2023 nian no sira ne’ebe kuantidade boot liu ne’e husi Suku Lalawa ema na’in-3, Suku Maudemo na’in-2, Kasabauk na’in-1, Beisek-1 postu Tilomar, iha Postu Suai iha Suku Kamanasa feto ida no Suku Suai Loro feto ida, postu Fatululik iha Suku Taroman feto ida, Postu Fatumea iha Suku Nanu feto ida, Postu Fohorem, iha Suku Fohorem feto ida, no Zumalai feto na’in ida” nia nia dehan.

Entertantu ba tinan ida ne’e iha Covalima feto hamutuk na’in 16 maka kandidata an ba suku hodi kompete ho mane sira iha eleisaun ne’ebe sei monu iha loron 28 Fulan Outobru tinan ne’e ba periodu 2023-2030.