Notisia Relevante : https://radiosuai.blogspot.com/2023/11/stae-covalima-kontinua-aluga-kareta-18.html

Diretór STAE Munisipiu Covalima Francisco Gusmão, hatete bazeia ba lei eleisaun suku nian sei hahu iha oras haleu 9 no sei remata iha tuku 3 lokraik, depois vota hotu hahu kedas kontajen iha sentru votasaun ida-idak.

“Ita nia eleisaun bazeia ba lei eleisaun suku nian ne’ebé ita hahu vota iha oras tuku 9:00 no remata iha tuku 3:00 loro kraik, depois de votasaun ita sei halo kontajen inisial iha sentru votasaun kada aldeia ida-idak remata sei lori akta sira ne’e ba iha suku ida-idak iha dia 14 de Novembru” informa nia ba jornalista sira iha STAE Covalima hafoin remata halo distribuisaun material sensitivu no laos sensitivu ba sentru votasaun sira, Domingu ne’e.

Lee tan : https://radiosuai.blogspot.com/2023/11/stae-covalima-komesa-verifika-buletin.html

Administradór Munisípiu Covalima Francisco de Andrade husu ba komunidade tomak iha Covalima atu partisipa hodi ezerse direitu votu tanba eleisaun suku ne’e akontesea deit tinan 7 dala ida.

“Ha’u apela, ita labele ejiji deit ita nia direitu maibe presija mos dever ne’e saida, eleisaun suku ne’e tinan 7 dala ida, tanba ne’e hotu-hotu presija partisipa iha eleisaun atu nune’e hili sira nia lider komunitaria, tanba eleisaun suku la’os mai husi partidu maibe komunidade rasik maka eskolla, tan ne’e sira nia kontribuisaun importante tebes, tanba ne’e tasa partisipasaun ne’e depende sira nia konsiensia moral atu tuir eleisaun ida ne’e” Asministrador dehan.

Administrador afirma iha eleisaun orgaun suku ba primeiru Volta tasa partisipasaun masimu, ema ne’ebé la komprende ne’e maka la partisipa iha eleisaun primeiru ne’e.

“Ita haree iha ne’eba tasa partisipasaun masimu maibe balu ne’ebé la komprende ne’e maka dala ruma sira la partisipa, maibe lei hatete ema hotu-hotu atu tuir eleisaun katak la obriga ema entaun ema hotu iha hanoin katak ba mos diak la ba mos diak, tanba ne’e hanesan autoridade durante ne’e observa antusias ema tuir vota, tan ne’e husu nafatin atu iha eleisaun segundu ronde tenke lao nafatin hanesan iha primeiru ronde” nia esplika.

Entertantu eleisaun orgaun suku ba segundu ronde iha Covalima hala’o deit iha suku 24 tanba iha eleisaun primeiru ronde suku 6 mak manan maioria hodi la hakat ba segundu Volta.

Jornalista : Julio Salinas

Editor : Chamot Nahac