COVALIMA—–Xefe Departamentu Programatiku Saude Munisípiu Covalima, Agapito de Jesus Nunes, informa iha fulan tolu nia laran Serbisu Saude Munisipiu Covalima konsege rejista kazu moras infeksaun respiratoriu (ISPA) hamutuk rihun-6.090 tuir maka moras tee been hamutuk-903, moras kulit ka isin katar hamutuk-875.
“Iha biban ida ne’e hakarak atu esklarese ba publiku katak Covalima iha fasilidade saude hamutuk-31 kompostu husi sentru saude-7 no postu saúde-24 ne’ebe ejiste iha Covalima laran tomak ho rekursu ne’ebe ita destaka ba fasilidade Saude-31 ne’e hamutuk ema na’in-308, ho sira nia serbisu direita diak tebes kada loron halo serbisu atendimentu hodi hetan iha trimestral ida ne’e hahu husi fulan Janeiru to’o Marsu tinan ne’e ita konsege rejista moras as liu maka ISPA hamutuk ema na’in-6.090 afeta, moras diarea (tee been) hamutuk ema na’in-903, moras kulit ka isin katar hamutuk ema na’in-875, moras pneumonia (mear) hamutuk ema na’in-624 no moras sira seluk tan ne’ebe profesional saude halo atendimentu direita ba komunidade sira iha fasilidade saude ne’ebe ohin temi ona” informa Xefe Departamentu Programatiku Saude Munisípiu Covalima Agapito de Jesus Nunes ba jornalista hafoin partisipa iha workshop ne’ebe hala’o husi Ministeriu Saude ba nivel Rejional kona-ba planu mikro nivel sentru saude komunitaria ba Serbisu Munisipiu Aileu, Ainaro, Covalima no Manufahi, ne’ebe hala’o iha Salaun enkontru Eskola Sekundaria Geral Publika Suai, kuarta (12/04).
Agapito afirma moras ISPA ne’e nia kauza mai husi buat oi-oin mak hanesan mai husi hijene oan sira no mos hijene ba an rasik, mai husi rai rahun sira, mai husi ambiental ne’ebe ladun diak ida ne’e bele afeta ba moras ISPA ba ema nia vida liliu ba labarik ki’ik sira.
Nia esplika meus prevensaun barak loos ona parte saude sempre fo hanoin liu husi koalia direita maibe barak maka komuniade nia konesimentu sei dauk diak, maibe loloos ne’e fasil liu atu halo prevensaun ba moras hirak ne’e.
“Fasil liu atu halo ba ita nia familia sira maka fase liman beibeik ho sabaun lor-loron antes ou depois atu han no prepara hahan ba ita nia oan sira ne’e fasil loos mas iha implementasaun ami halo defisil la halimar bainhira atu halo buat ki’ik oan, apa lagi buat seluk atu implementa as liu ida ne’e” nia konta.(Azu)
