COVALIMA—–Diretóra Serbisu Saude Munisipiu Manufahi, Florencia Cortereal Tilman, hateten sei esforsu no serbisu maka’as hodi hapara moras Tubercloze (TBC) iha Munisípiu Manufahi, tanba Tina kotuk administrador deklara ona tenke hapara moras ida ne’e.
“Agora daudaun ami foku liu maka, hanesan programa hotu ami fo prióridade maibe ami tau prióridade liu ba moras TBC tanba ami nia Administrador Munisipiu Manufahi deklara ona iha 10 de Janeiru 2022 hapara moras Tubercloze iha Munisipiu Manufahi fin de Dezembru 2023 tanba ne’e ami esforsu loos hala’o ida ne’e” informa Diretóra Serbisu Saude Munisipiu Manufahi, Florencia Cortereal Tilman, ba jornalista sira hafoin partisipa iha workshop ne’ebe hala’o husi Ministeriu Saude ba nivel Rejional nian kona-ba planu mikro nivel sentru saude komunitaria ba Serbisu Munisipiu Aileu, Ainaro, Covalima no Manufahi, ne’ebe hala’o iha Salaun enkontru Eskola Sekundaria Geral Publika Suai, Tersa (11/04).
Nia dehan durante serbisu saude Munisípiu Manufahi esforsu atu kombate moras ida ne’e no involve iha programa saude na familia tan hotu-hotu sai ba halo atendimentu ba komunidade sira.
Nia dehan durante tun ba iha baze halo atendimentu ba komunidade sira laos haree deit ba moras Tubercloze maibe haree mos moras hotu-hotu ne’ebe pesoal saude sira hala’o ba komunidade sira.
Diretóra ne’e sublina atu hatete katak moras Tubercloze as iha Manufahi maibe kona-ba dadus hira ida ne’e ladun hatene klaru.
Nia hatete atu kombate moras Tubercloze iha Munisípiu Manufahi laos esforsu mesak husi parte serbisu saude deit maibe involve hotu autoridade lokal sira.
“Maibe ho komitementu Administrador deklara laos ami saude mesak maka esforsu maibe ami hamutuk ho administrador tanba ami iha task force lidera direitamente husi administrador munisipiu ne’e ami bele hamutuk hodi kombate TBC, ne’ebe laos ami saude mesak maibe hahu husi ami nia autoridade sira hahu husi administrador munisipiu, administrador postu Administrativu sira, xefe suku, xefe aldeia, komandante polisia sira, ami hotu-hotu hamutuk atu bele kombate moras TBC iha Manufahi” nia esklarese.
Nia dehan meus ne’ebe halo atu hodi hapara moras Tubercloze iha Munisípiu Manufahi maka parte saude halo tratamentu saude ba komunidade, fo informasaun lao nafatin, halo screening ba pasiente hotu tamba pesoal saude sira lao tama sai uma.
Liu husi lao tama sai uma kuandu mediku ka pesoal saude sira indentifika katak iha uma ida ne’e ema mear liu husi semana rua foti kedas nia kaben tasak hodi ba halo pemeriksa an, kuandu liu husi pemeriksa an hatete ema ne’e pozitivu entaun iha familia ida ne’e nia laran tenke hasai hotu kaben tasak, ida ne’e maka esforsu saude nian.
Nia dehan ho esforsu atu kombate moras Tubercloze iha Munisipiu Manufahi ida ne’e realiza tanba hetan suporta husi parseiru Global Fund ho Caritas ne’ebe suporta saude hodi tama sai uma komunidade nian.
Nia informa difikuldade ne’ebe hasoru iha terenu maka dala ruma pasiente sira susar tanba sira moe atu fo sai sira nia moras ba mediku sira, maibe parte saude kontinua fo nafatin informasaun dehan katak moras ne’e kona lalais maibe nia atu diak fali ne’e sei han tempu tratamentu bele to’o fulan 6 ou liu foin bele hetan moras diak.(Azu)
