Covalima (RCCT) 03-05-24-Servisu Munisipál Seguransa Alimentár (SMSA) Munisipiu Covalima desimina informasaun ba komunidade sira iha Suku Suai-Loro, Postu Administrativu Suai, konaba lala’ok no pratika seguransa aihan iha ida-idak nia uma kain.
Diretór Servisu Munisipál Seguransa Alimentár, Munisípiu Covalima Hilario Oliveira Mendonça, hateten objetivu husi desiminasaun ne’e maka atu hato’o informasaun ba komunidade liliu ba to’os na’in sira nue’e bele hatene asegu aihan ne’ebe sira produs husi to’os rasik.
“Atividade ida ne’e ita hala’o iha nivel postu maibe ita mai direita kedas iha nivel suku, atu nune’e ita nia komunidade sira iha suku bele hatene duni informasauan konaba oinsa maka halo pratika seguransa alimentar, entaun liu husi pratika agrikultura ba hahan ne’ebé sira produs ne’e garante ona katak sira nia ai han ne’e seguru ka lae , se tempu tomak ida ema individu ida nia hahan la to’o ne’e signifika katak ninia kondisaun ne’e in-siguransa katak ai han menus hela, maibe liu husi desiminasaun informasaun agora daudaun ita hala’o sira hatene ona informasaun katak afinal seguransa alimentar nia lalaok mak hanesan ne’e komesa husi ita nia preparasaun, oinsa maka ita nia kondisaun ai han iha uma laran ne’e seguru ona ne’e hatudu katak seguransa alimenta ne’e di’ak” informa Diretór Servisu Munisipál Seguransa Alimentár, Munisípiu Covalima Hilario Oliveira Mendonça, ba RCCT iha Suku Suai-Loro, Postu Administrativu Suai, Sesta (03/05).
Xefe Suku Suai-Loro, Manuel Gomes da Costa, reprezenta nia povu suia loro kongratula servisu munisipal seguransa alimentar ne’ebé fasilita ona formasaun ba komunidade liliu ba to’os na’in sira atu bele hatene asegura ai han iha ida-idak nia uma.
“Ho prezensa seguransa alimentar mai desimina ona informasaun seguransa alimentar no ko’alia mos konaba mal nutrisaun, signifika dala ruma ema balu halo ona peskiza dehan katak iha teritoriu Timor-Leste inklui Covalima espesifikumente iha Suku Suai-Loro tama hotu iha hahalok mal nutrisaun ho sira nia prezensa mai to’o iha ne’e, entaun hahalok ida hatudu ba ita katak mal nutrisaun ne’e hare ho lian tetun lolos ne’e katak ai han la di’ak ka ai han la to’o, tan ne’e oinsa maka ita atu halo ai han di’ak ita tenke hadi’a ba oin hadi’a ai han, hadi’a to’os ho natar depois ai han sira ne’ebe kuda bele ajuda ona ba iha ita nia nesesidade kala ho loron, tempu to’o ona atu hadi’a ita nia an liu husi hadi’a to’os ho natar hodi hasae produsaun bainhira ita konsumu bele fo saude di’ak ba ita, tanba atu hetan saude di’ak ne’e bainhira ita la falta buat ruma liliu kona ba hahan” nia dehan.
Entertantu atividade desiminasaun informasaun konaba seguransa alimentar ne’e hala’o iha Sede Suku Suai-Loro, ne’ebé organiza husi Servisu Munisipál Seguransa Alimentár, Munisípiu Covalima no hetan partisipasaun husi Administrador Postu Administrativu Suai, Ilfonso Maria Amaral, Xefe Suku Suai-Loro Manuel Gomes da Costa inklui juventude feto-mane no komunidade agrikultor sira hotu.
Jornalista : Julio Salina
Editor : Chamot Nahac
