Covalima (RCCT) 07-04-25-Servisu Munisipal Asaun Sosial (SMAS) Munisipiu Covalima durante ne’e apoiu kaixaun ba familia matebian sira bazeia ba pedidu ne’ebé hato’o husi Lideransa Komunitaria (LK) sira.
Diretór Servisu Munisipal Asaun Sosial (SMAS) Munisipiu Covalima Clementino Bere, dehan kaixaun ne’ebé Servisu Munisipal Asaun Sosial (SMAS) Munisipiu Covalima apoiu ne’e bazeia ba pedidu husi xefe aldeia ka xefe suku hato’o mai iha SMAS.
“Nia regra ne’e hanesan ema kuandu mate familia matebian liga ho xefe aldeia no xefe aldeia liga ba xefe suku hodi hasai karta pedidu ida mai husi xefe suku depois haruka mai iha Servisu Munisipal Asaun Sosial (SMAS) ita hare tiha tuir nia medidas ita halo despaixu ba kompañia depois kompañia bele fo kaixaun” Diretór Servisu Munisipal Asaun Sosial (SMAS) Munisipiu Covalima Clementino Bere, deklara.
Diretór Servisu Munisipal Asaun Sosial (SMAS) Munisipiu Covalima Clementino Bere, durante apoiu kaixaun ba komunidade sira husi postu administrativu hitu maibe SMAS menus atende pedidu husi lideransa komunitaria sira iha postu administrativu ne’ebé lokaliza do’ok husi kapital munisipiu.
“Durante apoiu kaisaun ne’e ita bele dehan ema ne’ebé k’bit laek, tanba ita hetan pedidu mai husi xefe suku ona otomatikamente ita tenke apoiu tanba bazeia ba pedidu, maioria postu administrativu-7 iha Munisipiu Covalima hanesan atende pedidu, dala ruma mos pedidu laiha tanba kestaun dook, kondisaun estrada la di’ak ne’e maka sira la husu kaixaun mais hanesan iha kota laran ne’e sempre husu kaisaun ita apoiu, informasaun sira hatene so problema ida maka dook no estrada maka ladi’ak hodi difikulta sira atu husu kaixaun” nia dehan
Enkuantu iha trimestral primeiru tinan 2025, Servisu Munisipal Asaun Sosial (SMAS) Munisipiu Covalima, apoiu kaixaun ba familia matebian hamotuk kaixaun unidade 51 ho montante osan hamotuk dolar amerikanu rihun hitu, sanulu resin lima ($ 7, 015.00).
Jornalista : Julio Salinas
Editor : Chamot Nahac
