Covalima (RCCT) 04-07-2024-Servisu Munisipal Ajensia Fiskalizasaun (SMAF) deskobre, programa merenda eskolar ne’ebé implementa iha eskola imfrenta problema laiha fatin ba kuzeneru sira, fatin atu rai hahan no mos problema ho menu hahan ba labarik sira.
Diretór Servisu Munisipal Ajensia Fiskalizasaun Covalima, Anacleto Martins, hatete problema hirak deteta hafoin halo fiskalizasaun iha eskola ensino baziku central 5 no eskola baziku filial 10.
“Parte merenda eskolar ne’e ita hare liu ba iha eskola ensinu baziku sira, iha ne’eba ami la’o kuaze iha esninu baziku Sentral 5 ho eskola baziku filial 10, iha ne’eba ami deteta problema bo’ot liu ne’e maka fatin ba kuzenerus sira, fatin ba rai hahan no menu ba labarik sira nian, iha ne’eba ita tenta kordena fila fali bazeia ba ita nia fiskalizasaun hodi hato’o ba Prezidente Autoridade Munisipiu (PAM) no mos hato’o ba iha servisu munisipal edukasaun oinsa atu bele hare fila fali eskola sira hasoru problema hirak ne’ebé ohin ita mensiona ne’e para ba oin ne’e bele hadi’a, iha ne’ebé karik ami deteta balu la han osan tenke devolve fila fali ba iha kofer estadu, tanba iha ne’eba osan kada estudante $ 0,42 sentavus maibe iha ne’e sentavus 35 ba iha hahan ba labarik sira kada ema, kada loron no osan sentavu 7 ba iha administrasaun uza ba sosa be no ai maran inklui ba administrasaun sira seluk iha ne’eba, kuandu iha ne’eba ita deteta loron efetivu ho total alunus iha ne’eba karik bazeia ba ita nia fiskalizasaun iha ne’eba la han malu ita sei haruka parte EJS ne’e devolve fila fali osan ne’ebé ita deteta iha ne’eba, ida ne’e bazeia ba planu diresaun fiskalizasaun ninian” informa Diretor Servisu Munisipal Ajensia Fiskalizasaun Covalima, Anacleto Martins.
Anacleto mos relata konaba rezultadu fiskalizasaun iha programa Nasional Dezenvolvimentu Suku (PNDS) liliu konaba Uma Naroman ba Povu (UNP) iha Postu Administrativu Muakatar ne’ebé atinje ona pursentu sia nulu resin.
“Liga ba parte UNP nian progresu balu iha ne’eba la’o to’o ona pursentu 95 ba iha suku rua hanesan Mataii no Belekasak, maibe parte Suku Ogues Holpilat ne’e ita presija hare fila fali tanba ninia progresu ne’e seidauk to’o pursentu 90, kuaze uma 20 ba leten ne’e seidauk to’o pursentu 90 ida ne’e presija ita kordena fali ho parte PNDS, autoridade lokal inklui hato’o mos ba parte ekipa jestaun suku sira (EJS) halo nusa maka ita hare solusaun ho parte hotu liga ba uma naroman ba povu nian” nia dehan.
Diretór Servisu Munisipal Ajensia Fiskalizasaun Covalima Anacleto Martins, mos informa konaba lakuna ne’ebé ekipa fiskalizasaun deteta iha terenu, sei relata ba Prezidente Autoridade Munisipal hodi bele toma medida no orienta ba diresaun kompontente atu bele hadi’a programa hirak ne’e.
Jornalista : Julio Salinas
Editor : Chamot Nahac
