Covalima (RCCT) 10-07-24-Joven Covalima na’in nen ne’ebé durante ne’e partisipa kursu lian korea iha Sentru Komunitaria Aprenfizajem (SKA) Morin Suai, tuir ona ezame hodi prepara atu kontinua partisipa fali ezame iha Bekora Dili wainhira SEFOPE Publika ona sira nia naran.
Prezidente SKA Morin, Jeferino de Oliveira realta, ezame lian korea ba Juven na’in 6 ne’e hetan observasaun direita husi Seksaun Informasaun Profesional SEFOPE Munisipiu Covalima.
“Ohin ita halo ona ezame ba sira, oinsa sira bele hetan sertifikadu munisipiu ninian prepara hodi ba tuir ezame iha sentru Bekora ne’eba, rekursu ne’ebé ita formador ne’ebé atu fahe nia esperiensia ne’e mai ho nia abilidade konesimentu ida ne’ebé klean, durante atu fahe nia matenek depois fo buat ida ne’ebé nia hatene liliu relasiona ho buat ida atu ba servisu iha ema nia rain, durante sira tuir formasaun ne’e hahu tuir tarjetu ida ne’ebé sentru formasaun fo sai kada fulan 6 foin bele tuir ezame, ne’e maka sira hahu iha fulan Janeiru ohin sira bele tuir ona ezame ikus, hodi hein sira nia naran SEFOPE fo sai sira bele ba tuir ezame iha Dili ne’eba, sira ne’ebé ohin mai tuir ezame ne’e ativu hotu, sira maka ohin tuir ne’e iha joven na’in-6 de’it barak maka la partisipa tanba balu hela dook no balu ba buka hela servisu iha Dili ne’ebé sira la partisipa iha ezame ne’e maibe SKA sei kontinua fo oportunidade ba sira atu bele mai tuir ezame sei la taka dalan ba sira” dehan Prezidente SKA Morin Suai, Jeferino de Oliveira ba jornalista sira Tersa (09/07).
Xefe Seksaun Informasaun Profesional Munisipiu Covalima, Velijiana de Jesus Barreto, husu ba jovensira atu prepara futuru liu husi tuir formasaun iha SKAMorin Suai.
“Atividade ba ohin loron mai observa ba ita nia juventude sira tuir ona formasaun lian Korea nian, atu nune’e tau matan no servisu hamutuk ho SKA Suai ba joven sira konaba lian Korea, lian Inglesh, komputador, tan ne’e husu ba joven sira tenke prepara-an katak buat sira ne’ebé ita bele aprende, bele mai aprende iha SKA Suai atu nune’e ita bo’ot sira bele hadi’a futuru oin, ohin loron ami identifika ona iha SKA Suai ho kondisaun la masimu maibe ba joven sira na’in hira ne’e tuir ona ezame ne’e iha interese tebes duni tanba durante fulan 6 sira tuir duni formasaun iha fatin ida ne’e liliu konaba lian Korea nian” nia dehan.
Formando Helder Otelho Siga Oliveira, haktuir durante fulan 6 tuir formasaun lian Korea nian iha SKA Suai ladun gasta osan atu selu transporte kompara ho tuir formasaun iha Diline’ebe tenki gasta osan barak hodi selu mikroleta.
“Sira fo formasaun ba ami ho di’ak, no mos ita tuir formasaun iha Suai la hasai osan transporte maibe kuandu ita tuir formasaun iha Dili ne’e ita sei selu transporte, bainhira liu husi ezame ida ne’e maka ba tuir tan ezame iha Dili liu hau nia mehi hakarak atu ba servisu iha ema nia rain liliu iha Korea” nia informa.
Formandu sira ne’ebé durante ne’e tuir formasaun konaba lian Korea iha Sentru Komunitaria Aprendizajem Morin Suai hamutuk ema na’in-34, maibe sira ne’ebé tuir ezame iha de’it ema na’in-6 tanba balu hela dook no balu ba buka ona servisu iha Dili, engkuantu ezame ida ne’e hetan observasaun direita husi Xefe Seksaun Informasaun Profesional SEFOPE Munisipiu Covalima, no ezame ne’e rasik hala’o Sentru Komunitaria Aprendizajem (SKA) Morin Suai.
Jornalista : Julio Salinas
Editor : Chamot Nahac
