Covalima (RCCT) 12-05-25-Konsellu Kombatentes Libertasaun Nasional (CCLN-Sigla Portuguesa), Munisipiu Covalima, deteta membru Polisia Nasional (PNTL) Covalima na’in ida falsifika ficha veteranu rejistradu 2009 ho kategoria dedikasaun esklusivu 4 a 7 hodi fasilita nia atu kompleta rekejitus ba promosaun diviza husi primeiru sarjentu ba inspetor asistente.
Sekretariu Konsellu Kombatentes Libertasaun Nasional (CCLN-Sigla Portuguesa), Munisipiu Covalima Joaquim Barros “Sikat Let” hatete membru PNTL ne’ebé falsifika dokumentu la rejistu iha Sistema lista edital veteranu 2009 no mos tuir informasaun husi responsavel kaixa sira katak membru polisia refere la partisipa iha frente klandestina iha tempu luta nia laran.
“Falsifika dokumentus ne’e la’os dokumentus seluk naran ne’ebé mak sira publika sai atu sa’e devisa ninian membru polisia ida husi Munisipiu Covalima ninian iha karta hatete iha ne’e ba ne’e nia tama iha kategoria 4-7 didikasaun esklusivu 4 o 7 anos. Ami hare fali iha sistema ne’e nia naran registu la iha. Nia foti kategoria 4-7 ne’e mai husi ne’ebé? tamba nia la registu depois ida ne’e responsabel sira husi grupu ninian mos hatete kata ema ne’e uluk la partisipa iha frente klandestina.” Sikat Let esplika.
Sikat let mos relata dadaun ne’e submete ona karta ba Ministeriu Interiuor liu husi komisaun trasisaun devisa ninian hodi fo atensaun ba membru refere.
“Agora dadaun submete ona karta ba diresaun, liliu ba iha presidente komisaun trasisaun ba devisa ninian hodi fo despaisu kombatentes sira nian obrigasaun hanesan konsellu hare asuntu hanesan ne’e nia hasoru duni ema veteranus nia katus komu nia la merese duni, porque ami la kestiona nia devisa maibe konsellu kestiona ba dedikasaun esklusivu 4 a 7 ne’e nia foti husi ne’ebé?, ida ne’e mak preokupasaun husi ami konsellu nian tanba ida ne’e ita sei buka nafatin aktus ida ne’e la bele repete tan no la merese atu uza, tanba hanesan PNTL liliu ita hatene implementasaun lei, tanba PNTL hanesan organizasaun lei hodi nune’e sira mos labele viola lei ne’ebé mak sira mak hanesan Autor primeiru ne’ebé mak implementa lei, se sira hakarak husik hela nafatin depende, maibe konsellu nafatin obrigasaun dehan katak konfirma nafatin karta ne’ebé mak konsellu munisipal apresenta” tenik nia.
Konsellu Veteranu Munisipiu Covalima, Kestiona ne’e bazei ba lista PDF ne’ebé PNTL publika konaba membru sira ne’ebé foin hetan promosaun diviza.
Entretantu molok notisia ne’e lansa, jornalista sira tenta atu konfirma ho komandante PNTL Munisipiu Covalima, maibe komandante PNTL Munisipiu Covalima sei atende servisu iha estrajeiru.
Jornalista : Alfredo Barreto
Editor : Cahmot Nahac
