Covalima (RCCT) 26-02-25- Governu liu husi Servisu Munisipal Obras Publika no Transporte (SMOPT) Munisipiu Covalima, iha tinan ne’e sei tau prioridade ba projetu konstrusaun estrada rural ligasaun Postu Administrativu Fatumae, Fatululik no Postu Administrativu Suai iha area Tobur.
Nune’e Diretór SMOPT Munisipiu Covalima, Sidonio Gusmão informa, katak projetu estrada rural iha postu administrativu tolu ne’e iha ona faze kontratu ba konstrusaun.
“Projetu 2025 ita sei tau uluk prioridade ba estrada rural hotu, ne’e sei implemnta iha Postu Administrativu Fatululik, Fatumea inklui Postu Administrativu Suai iha area Suku Beko sa’e ba Aldeia Tobur, maibe iha 2025 nia laran hanoin ita tau deit prioridade, ida ne’ebé tama kontratu maka ha’u temi ona iha Postu Fatumea, Fatululik ho Postu Suai, maibe ba postu-4 seluk hanesan Postu Administrativu Zumalai, Fohorem, Maukatar ho Tilomar hanoin ne’e faze ida tama iha prioridade maibe depois ita submete ba iha Obras Publiku nasional maka foin termina atu implementa” Diretór Servisu Munisipal Obras Publika no Transporte (SMOPT) Munisipiu Covalima, Sidonio Gusmão, Informa.
Servisu Munisipal Obras Publika no Transporte (SMOPT) Munisipiu Covalima mos durante ne’e kontinua halo monitorizasaun ba estrada on going no mos monitoriza ba projetu kontratu foun ne’ebé atu implementa iha Munisipiu Covalima.
“Durante ita kontinua halo monitorizasaun maske kompetensia balu ne’ebé maka ita obras publika laiha, tanba kestaun balu ne’ebé maka seidauk intende didi’ak husi governu sentral, tan ne’e husi Servisu Munisipal Obras Publika halo monitorizasaun direita ba estrada ne’ebé ejiste liliu estrada on going sira ne’ebé iha, balu ne’ebé maka inisiu 2025 halo ona kontratu foun ita kontinua implementa iha tinan ida ne’e” tenik, Sidonio Gusmão.
Enkuantu Diretór, Sidonio Gusmão dehan konaba Projeitu balu iha Obras Publiku Munisipiu Covalima, balu finaliza ona iha tinan 2024 no balu sei finaliza iha tinan 2025.
Jornalistaa : Julio Salinas
Editor : Chamot Nahac
