Covalima (RCCT) 28-08-23—Sekretariu Munisipiu Covalima, Francisco de Jesus Alves halo abertura ba kompetisaun kuda halai taru iha Suku Suai-Loro, Postu Administrativu Suai, hodi selebrasaun loron istoriku rua hanesan Falintil no loron konsultasaun popular iha Covalima.
Sekretariu Munisipiu Covalima, Fracisco de Jesus Alves hanesan mos prezidente Komisaun organizadora ba komemorasaun ne’e, hateten kada tinan kompetisaun kuda halai taru ne’e hodi festeza no komemora loron Falintil nebe monu iha 20 agusto ba dala 48 no selebra konsultasaun popular monu loron 30 agusto ba dala 24.
“Kuruda de Kabalu ne’e ita sempre realiza, Tinan ne’e ita realiza hodi komemoras loron nasional rua, Komemora loron falintil ba dala 48 no konsulta popular ba dala 24 iha Covalima” Sekretariu Munisipiu Covalima, Fracisco de Jesus Alves, esplika
Prezidente Kuridade Kuda Munisipiu Covalima, Castro Amaral, haktuir kompetisaun kuda halai taru ne’e realiza tanba servisu hamutuk ho autoridade lokal sira, no ba kompetisaun ida ne’e parte seksaun kurida kuda nian hetan orsamentu ho montante $ 1000 resin husi komisaun organizadora.
Nune’e mos, Kavaleiru ka Joki, Sergio Viera Demelo Amaral das Neves Lopes, sente kontente tanba nia parte bele hetan primeiru lugar, segundu lugar ho kuda mak lahanesan iha kompetisaun, nune’e nia husu governu atu kontinua ho kompetisaun kurida kuda iha Covalima kada tinan.
“ha’u sente kontenti, tanba hau bele hetan Juara ho ami nia kuda sira, hau husu ba govermu atu kotinua loke eventu halai taru kuda, kada tinan para ami mos bele kontinua kesi kuda no nafatin partisipa hodi anima komunidade sira” katak Sergio
Entertantu kurida kuda ne’e anima tebes komunidade iha Covalima tanba kurida kuda hanesan desportu komunitaria ida ne’ebe, so uniku Covalima maka sempre realiza kompetisaun kuda halai taru hodi anima komunidade sira selebrabrasaun loron nasional.
Jornalista : JS & Moi Chung
Editor : CN
