Covalima (RCCT) 09-07-24-Durante fulan 6 nia laran hahu husi fulan Janeiru- Juñu 2024, SERVE.IP estabelesementu iha Munisipiu Covalima, rekolla ona osan hamotuk dolar Amerikanu Rihun Sia, Atus hitu resin, rua ($ 9,702.00) hatama ba kaixa jeral estadu.
Koordenador SERVE.IP Estabelesementu Sukursal Covalima, Pedro Domingos dos Santos, hatete osan hirak ne’e SERVE .IP rekolla husi Covalima oan sira rasik ne’ebé halo rejistu foun ba lisensa negosiu, halo renovasaun no altersaun husi em nome individual (ENIN) ho tipu unipesoal limitada no limitada Lda.
“Hahu husi fulan Janeiru to’o Junhu 2024 ne’e ita hatama ona osan ba kofer estadu ho montante dolar Amerikanu Rihun Sia Atus Hitu resin, ($ 9,702.00), hanesan tinan baibain ita rekolla husi rejistu foun, renovasaun ho alterasaun, liliu iha parte renovasaun nian ne’ebé ita hare lisensa sira ne’ebé mate, sira ne’ebé kona iha parte sektoral nian ne’ebé bolu sejeitu ne’e sei selu osan ho montante dolar Amerikanu nen nulu ($ 60,00) ba kada atividade ida, tinan-tinan nia sempre mate, maibe iha lisensa nian maka mate, iha deklarasaun preve la mate, maibe parte lisensa sektoral nian maka mate ne’e sei selu $ 50 kada tinan ida, maibe ida ne’e mos depende husi sektoral sai hanesan ezemplu iha turismu nian ne’ebé kona tinan 2 sira sei selu tinan 2 ne’e iha $ 120.00, nune’e mos iha parte saude nian liliu sira ne’ebé hari klinika privadu bainhira sira la selu liu ona to’o 5 sira mai atu renova fali ne’e tenke selu hotu kedas tinan lima nia laran ne’ebé sira la selu” dehan Koordenador SERVE.IP Estabelesementu Sukursal Covalima, Pedro Domingos dos Santos, ba jornalista iha nia k’nar fatin Segunda (08/07).
Pedro Domingos dos Santos, mos informa durante fulan 6 hahu husi janeiru to’o juñu 2024, SERVE.IP Estabelesementu Sukursal Covalima rejistu rejista emprezariu no negosiante foun hamutuk 141, Emprezariu tuan sira mak halo renovasaun ba dokumentu hamotuk 189, Alterasaun ba mudansa negosiu hamotuk 51.
“Konaba rejistu foun tinan ida iha fulan 6 nia laran ne’e hamutuk negosiante no emprezariu sira mai rejistu foun ne’e hamutuk 141, iha renovasaun ba negosiante no emprezariu hamutuk 189 no alterasaun ba mudansa ne’e iha negosiante no emprezariu hamutuk 51 ne’e kada tipu sira ne’e sei fahe hanesan iha ENIN nian maka hamutuk-102, Unipesoal-28 ho Lda-1, ba renovasaun-189 fahe fali tan hanesan ENIN nian hamutuk-79, unipesoal Lda-100 no Lda-10, alterasaun nian nian mos hanesan iha ENIN ne’e hamutuk-16, Unipesoal Lda-46 no limitada Lda laiha” nia esplika.
Enkuantu reseitas hirak ne’e mai husi rejistu foun, renovasaun no alterasaun mai husi Em Nome Individual (ENIN) ho tipu hanesan Unipessoal, Limitada no Limitada LDA, husi tipu hirak ne’e iha fulan Janeiru nia laran rekolla osan ho montante $ 1,451.00, Febreiru $ 1,591.00, Marsu $ 2,019.00, Abril $ 1,623.00, Maiu $ 2,347.00 no juñu $ 671.00. total iha fulan 6 nia laran rekolla jamutuk osan $ 9,702.00.
Jornalista : Julio Salinas
Editor : Chasmot Nahac
