Covalima (RCCT) 16-02-23–Sekretaria Estadu Kooperativa (SEKOOP), Elizario Ferreira hala’o sensibilizasaun formasaun ba Grupu koperativa Hamutuk Buka Naroman (HABUNA), iha Aldeia Fatu-Loro, Suku Taroman, Postu Administrativu Fatululik, kon-ba oinsa atu bele jere osan no rai osan bainhira grupu ne’e hetan osan rasik liu husi sira nia esforsu serbisu hamutuk.
“Ohin ita hamutuk iha fatin ida ne’e hau sei ko’alia kona-ba buat rua, primeiru sei ko’alia kona-ba saida maka Kooperativa halo tiha ona no saida maka sei halo ba oin” deklara Sekretaria Estadu Kooperativa (SEKOOP), Elizario Ferreira, iha nia diskursu hafoin fo formasaun ba grupu kooperativa Hamutuk Buka Naroman iha Fatu-Loro, Kinta (16/02)
Sekretaria Estadu Kooperativa (SEKOOP), Elizario Ferreira, apresia ho grupu Kooperativa HABUNA, maske haree husi aspetu rua, aspetu ida partisipasaun membru iha grupu kooperativa ida ne’e sei menus, maibe haree ba iha aspetu ida kapital aumenta.
Sekretaria Estadu Kooperativa ne’e konta nia esperiénsia katak iha tinan 2000 nia parte harii koperativa, sai membru kooperativa foin halo tinan 33, maibe hanesan mos ema ne’ebe mobilizador kooperativa, iha momentu ne’eba harii Kooperativa ho montante osan dalar Amerikanu atus lima ualu nulu resin ($ 585) maibe tempu ne’eba sei uza osan rupiah, membru agora mak rihun 2 resin, ho osan $ 585 agora foin maka tokon $ 2 resin.
“Ami nia kooperativa hakiak manu broiler foin mak rihun 40, manu lokal hamutuk iha rihun 9, fahi iha 300 resin maibe moras Africa foin lalais mosu ne’e halo fahi 200 resin mate, kona-ba karau foin mak 700 resin, hetan buat sira hanesan ne’e tanba membru sira nia serbisu badinas, tanba ne’e husu imi grupu kooperativa HABUNA mos tenke serbisu badinas atu nune’e bele hetan mos rezultadu diak” dehan Sekretariu Estadu Kooperativa Elizario Ferreira.
Sekretariu Estadu Kooperativa Elizario Ferreira, hatete kuandu imi iha grupu kooperativa HABUNA badinas serbisu bele riku tanba imi iha oportunidade boot, SEKOOP halo planu ida ne’ebe bolu naran merkadu iha fronteira, tanba ne’e postu Fatumea hetan ona apoiu besik rihun $ 50 atu loke loja kooperativa no sira aslera ona.
Prezidente Hamutuk Buka Naroman, (HABUNA) Baltazar da Cruz, hatete inisiu harii grupu kooperativa ida ne’e hasoru problema barak oinsa atu lidera malu, no fo hanoin ba malu kona-ba Administrasaun nian liliu halo relatoriu sempre hasoru failansu tanba kapasidade ladun to’o kona-ba kooperativa nian.
“Hahu husi inisiu ami harii grupu kooperativa ida ne’e iha problema barak mak ami hasoru hanesan, atu lidera malu, atu fo hanoin ba malu, hasoru failansu barak iha administrasaun liliu kona-ba halo relatoriu nian sempre hasoru failansu tanba ami nia kapasidade ladun to’o kona-ba kooperativa nian, tan ne’e ami mos presija tulun husi SEKOOP husi nasional mai fo kapasitasaun treinamentu ho ida ne’e ba dala rua ona, tan ami durante sei iha failansu uitoan kona-ba relatoriu nian maibe ho treinamentu ida ami bele kapasidade kona-ba halo relatóriu nian” deklara Prezidente Grupu Kooperativa HABUNA, Baltazar da Cruz, ba jornalista sira Fatu-Loro.
Nia haktuir governu liu Sekretaria Estadu Kooperativa oras ne’e mai fasilita deit formasaun ba grupu kooperativa HABUNA, maibe kona-ba orsamentu to’o oras ne’e governu sei dauk fo apoiu ruma kona-ba osan.
Nia dehan Grupu Kooperativa HABUNA hahu inisiu harii ho ema na’in-20 tau hamutuk osan ho montante dolar Amerikanu atus lima rua nulu resin ualu ($ 528.00) ikus mai hetan aumenta tan membru hamutuk na’in-81, osan oras ne’e daidaun iha hamutuk dolar Amerikanu rihun ualu, tolu nulu resin lima centavus lima nulu ($ 8.35.50).
Prezidente Kooperativa HABUNA afirma prosesu hahu tama kooperativa ne’e susar tanba membru barak atu dada-an hotu ona maibe sorted governu tau ona nia emar sira to’o iha postu mak hodi organiza fali maka Kooperativa HABUNA la’o to’o ohin loron maske hasoru dezafius oioin.
Baltazar promete vizaun Grupu Kooperativa HABUNA hakarak atu loke liras ba ema hotu, atu nune’e nia diak ne’e ema hotu tenke hatene.
Nia dehan atividade Grupu Kooperativa HABUNA mak hanesan fo impresta osan ba malu, planu halo to’os, planu halo kumunal bazeia membru grupu hotu nudar to’os na’in uza serbisu ne’ebe ba iha to’os hodi hetan osan.
Jornalista : JS
Editor : Chamot Nahac
