Covalima (RCCT) 16-09-24-Segunda feira ne’e Sekretariu Estadu Kooperativa (SEKOOP) Arsenio Pereirra, hamutuk ho Movimentu Kamponeza Timor-Lorosa’e (MOKATIL) no to’os na’in sira iha Aldeia Salele Bo’ot, Suku Lalawa, Postu Administrativu Tilomar hala’o lansamentu kuda Bafo iha rai hektares 3.

Sekretariu Estadu Kooperativa (SEKOOP) Arsenio Pereirra, ba jornalista sira hatete kuda Bafo ne’e hanesan programa governu nian ne’ebé halo parseiru ho MOKATIL prepara ba lansamentu ne’e.

“Covalima ida ne’e la’os primeiru ves, maibe ne’e dezde ha’u nia mandatu oitavu governu nian iha tinan rua nia laran, Covalima halo produsaun barak, tanba ne’e iha tinan kotuk assume fali kargu hanesan Sekretaria Estadu mos ami mai halo lansamentu no halo ona kolleta dala hira ona, no ba Epoka ida ne’e mai fali iha Aldeia Salele Bo’ot halo lansamentu, momentu iha programa MOKATIL ho SEKOOP hanesan parseiru, ne’ebé iha programa sira kuda Bafo to’o produtu finais sai hanesan programa konjuntu ida, ba tinan ida ne’e epoka ba dala rua nian, ita hatene katak sempre kuda dala ida koleta dala rua” dehan Sekretariu Estadu Kooperativa (SEKOOP) Arsenio Pereirra.

To’os Na’in Teofilo de Araujo husu governu liliu SEKOOP atu ajuda trator nune’e bele utiliza hodi fila rai. Nia mos dehan iha mehi hakarak hari grupu kooperativa iha Aldeia salele bo’ot.

“Programa kuda Bafo ne’e ami hakarak haburas iha Aldeia Salele Bo’ot, no iha biban ida ne’e ami iha mehi ida hakarak atu hari duni kooperativa, ne’e ami mehi, buat hirak ne’e no ami nia hanoin ida ne’e katak SEKOOP maka hakat ona mai iha ne’e ami fo hanoin aban bainrua ami sei halo ida ne’e tenke la’o ba oin, ami prontu atu halo maibe ami kbi’it maka lato’o, dala ruma ami halo ho liman deit, ami atu halo barak mos ladi’ak, tan ne’e se karik tau matan mos ba buat sira ne’e hotu, para ami petani atu hamenus importasaun husi rai liur, ita tenke servisu maka’as hodi has’ae produsaun rai laran” dehan To’os Na’in Teofilo de Araujo.

Sekretariu Jeral MOKATIL Munisipiu Covalima Elias Agustinho, haktuir rai ne’ebé uza hodi kuda Bafo iha Aldeia Salele Bo’ot, Suku Lalawa hamutuk  iha hektares 10 mak identifika ona, maibe hahu uluk ho rai hektares 3 hodi halo lansamentu.

“Atu informa konaba rai iha Postu Tilomar, Suku Lalawa, Aldeia Salele Bo’ot, maka ohin loron halo lansamentu ne’e iha rai hektares 3, maibe ami sei kontinua kuda bafo ne’e ba rai hektares 10 ne’ebé identifika ona iha Salele Bo’ot, husi rai hektares hirak ne’e la’os ohin loron kuda hotu kedas maibe sei kuda tahap demi tahap” nia informa.

Entretantu Movimentu Kamponeza Timor-Lorosa’e (MOKATIL) iha Munisipiu Covalima  identifikasaun ona rai hamotuk hektar atus rua hat nulu (240) ne’ebé iha potensialidade atu bele uza hodi kuda bafo kayrala. Mak hanesan ; Postu Administrativu Suai iha rai hektar 40, Postu Administrativu Maukatar iha hektar 12, Postu Administrativu Fohorem hektar 12, iha area postu administrativu Tilomar rai iha hektar 124, seluk ne’e MOKATIL identifika ona iha Postu Administrativu Zumalai ho Postu Administrativu sira seluk.

Jornalista : Julio Salinas

Editor        : Chamot Nahac