Assume ba resposavelidade buka merkadu ba produtor sira hodi oferese ba programa merenda eskolar liu husi ministeriu edukasaun, maka SEKooP insetiva MOKATIL hodi sosa produtu bafo kayrala ne’ebe produs husi membru koperativa sira hafoin doversifika sai ai han nutritivu atu koresponde ba demanda Merenda eskolar.
“Ita bele dehan katak ne’e foin maka iha etapa ida foin teteu ne’e, iha fatin balu to’o ona hilirnisasi iha fatin ida ne’e mos to’o ona hilirnisasi katak tama ona iha produtus finais husi Bafo Kayrala direitamente ita bele konsumu ona tanba iha ne’e iha ninia makina pos koilleta iha kedan, pur ezemplu halo prosesa sai fos no fariña ne’e iha kedan para depois ita ba iha EBC Salele ita fornese ona nia iha paun iha kukis iha sokolate iha produtu iha sasoro ne’e tama ona iha merenda eskolar mesmu ita hatene katak nia kuantidade ne’e seidauk bo’ot” SEKoop Arsenio Pereira da Silva informa.
Iha fatin hanesan Sekretariu Jeral MOKATIL Munisipiu Covalima, Elias Agustinho informa produtu Bafo Kayrala ne’ebe SEKooP sosa kada kilograma ho foli sentavus tolu nulu resin hitu ($ 0,37) husi kustu ne’e kada membru na’in ida kontribui sentavus rua ba kaderneta koperativa nian.
“Ohin loron ida ne’e ami halo lansa mentu ba tetu ami selu kedas ba to’os na’in sira ho $ 0,37, menbru sira tau hela 2 sen iha koperativa ami atu hodi kesi membru MOKATIL, atu hodi habelar programa ne’e no mos labele iha hanoin katak ohin loron ha’u kuda ohin loron hotu lae?, ohin loron ha’u kuda kontinua tanba merkaduria iha ona” Nia dehan.
To’os na’in Arminda Martins, kontenti tanba Governu liu husi SEKoop sosa ona ninia produtu Bafo Kayrala ne’ebe nia kuda.
“Kontente tebes ho ami halo Bafo Kayrala ida ne’e, hetan osan husi kosar ben rasik. ohin ha’u hetan $ 309 ho kilograma 885, folin agora perkilo hetan 37 sen, ha’u hetan deit 309 tanba 7 dolar ko’a ba iha kaderneta koperativa nia” Arminda esplika.
Iha Covalima MOKATIL Prepara rai hamotuk hektares 334 maibe iha tinan ne’e hahu husi fulan janeiru to’o maiu foin utiliza hektares 160 ho membru grupu iha ema na’in 2000 resin hodi fo kontribuisaun ba produsaun Bafo Kayrala iha Covalima.
Jornalista : Moichung
Editor : Chamot Nahac
