Dili (RCCT) 15-04-25-Sekretaria Estadu Komunikasaun Sosial (SEKOMS) Liu husi Diresaun Nasional Dezenvolvimentu Media (DNDM) Apoiu osan dolar amerikanu rihun atus ida lima nulu ( $ 150,000.00) ba Radio Komunidade hamotuk 19 hodi tramite informasaun moris komunidade iha suku ba publiku.
Iha Serimonia Asina Kontratu entre SEKOMS no Radio Komunidade 19, iha Salaun Maria Gorreti Kaikoli Díli, SEKOMS, Expedito Dias Ximenes, Informa, osan ne’ebé aloka ba kada radio komunidade ho montente lahanesan ne’ebé bazeia nesesidade radio ida idak.
“ Husi Proposta ne’ebé sira propoin, tuir nesesidade ida idak nian, saida mak sira atu halo iha tinan ida ne’e nia laran, Ha’u aprova ho kuantidade osan la hanesan, Balun iha Sete Mil, Seis Mil no balun Nove Mil, Ida ne’e sira atu jere rasik” SEKOMS dehan iha salaun SEI Kaikoli, Dili (15/04).
Governante ne’e fundamenta, kada tinan governu sempre apoiu radio komunidade sira liu husi fundus transferensia publiku.
“SEKOMS tinan tinan, apoiu ba radio komunidade sira iha ita nia rain, tan radio komunidade ne’e, radio ida ne’ebé kria husi komunidade no ninia servisu ba Komunidade” Tenik SEKOMS.
Iha fatin hanesan, Diretór Diresaun Nasional Dezenvolvimentu Media (DNDM) Manuel de Fatima husi ba Jestor Radio Komunidade sira atu jere osan ho didi’ak tuir nesesidade hodi dezenvolve radio komunidade. Nia mos dehan, DNDM no Finanasas SEKOMS sei halo prosesu audit ba radio komunidade sira bazeia orsamentu ne’ebé sira hetan husi SEKOMS.
“Ita Asina KOntratu, para sia bele bele Jere tuir orientasaun ne’ebé ita diside tuir iha semana kontuk, ba futuru DNDM hamotuk ho finansa SEKOMS nian sei nafatin halo Avaliasaun, sei halo prosesu audit ki’ik oan ida” Diretór Diresaun Nasional Dezenvolvimentu Media (DNDM) Manuel de Fatima,Informa.
Entretantu, tinan ne’e Governu Liu husi Sekretaria Estadu Komunikasaun Sosial (SEKOMS) Hari tan Radio Komunidade foun hamotuk rua. Ida iha Laklubar, Munisipiu Manatutu no ida seluk Radio Komunidade Fronteira Balibo, Munisipiu Bobonaro. Nune’e, oras ne’e total Radio Komunidade iha Timor Leste hamotuk 21.
Reportazen RCCT
