Covalima (RCCT) 31-01-25- Servisu Rejistu no Verifikasaun Emprezarial, Instituto Publiku (SERVE I.P) hanesan instituisaun estadu nian hahu estabelese iha Munisipiu Covalima iha tinan 2020 to’o agora seidauk iha pesoal seguransa ida atu hodi asegura edifisiu.
Tan ne’e hafoin asume pozisaun nudar Koordenador SERVE,I.P Sukursal Covalima, Domingos Amaral foin hato’o karta pedidu ba Diresaun Nasional Seguransa Patrimoniu Publiku (DNSPP) Munisipiu Covalima husu atu koloka pesoal seguransa balu ba iha SERVE.I.P.
“Agora ita koordena ona ho diresaun seguransa sivil, oinsa atu monta seguransa iha ita nia edifisiu ne’e tanba agora daudaun ita nia seguransa laiha, tan ne’e maka ita koordena ona katak hein tempu badak ita bele hetan seguransa sivil para atu asegura ita nia edifisiu ne’e ho di’ak, atu nune’e ita nia aset sira iha atu asegura ho di’ak nune’e mos atu ita bele hala’o servisu ho di’ak” informa Koordenador SERVE. I.P Sukursal Munisipiu Covalima, Domingos Amaral.
Hatan ba ne’e Xefe Departamentu Diresaun Nasional Seguransa Patrimoniu Publiku (DNSPP) Munisipiu Covalima, Carolino Carvalho Besin, rekoñese simu duni karta pedidu husi Koordenador SERVE. I.P Sukursal Munisipiu Covalima maibe seidauk bele responde tanba rekursu DNSPP iha Covalima lato’o, maibe pedidu ne’e hato’o ona ba iha diresaun nasional.
“Iha fulan ida ne’e nia laran Koordenador SERVE. I.P Sukursal Munisipiu Covalima lori karta pedidu ida ba iha Gabinete DNSPP sira husu duni apoiu seguransa, mai ami tanba diresaun seguransa patrimoniu publiku ne’e ami nia responsabilidade, maibe iha momentu ne’eba ha’u nudar xefe departamentu seidauk koloka ka destaka membru seguransa ba iha SERVE. I.P tan de’it menus pesoal ne’ebé ami seidauk atende, ho ida ne’e maka ami hasoru difikuldade atu hodi atende pedidu sira ne’ebé tama mai iha DNSPP, ami menus tebes pesoal atu hodi destaka ba iha patrimoniu publiku sira hanesan edifisiu sira liliu SERVE. I.P, edifisiu Servisu Munisipal Obras Publiku, foin lalais mos pedidu ida husi Aero Portu Internasional Kay Rala Xanana Gusmão no mos pontu entrada Salele sira mos presija guarda seguransa atu destaka iha ne’eba, foin lalais mos ha’u simu tan pedidu ida husi servisu munisipal rekursu umanu atu koloka mos pesoal balu fo seguransa ba iha residensia Prezidente Autoridade Munisipal (PAM) nian, maibe hare husi rekursu limitadu maka pedidu sira ne’ebé tama mai ami seidauk responde hodi koloka membru seguransa sira ba iha edifisiu publiku sira ne’ebé durante ne’e seidauk iha seguransa” nia dehan.
Entertantu oras ne’e daudaun edifisiu publiku sira hanesan SERVE. I.P, edifisiu Servisu Obras Publiku, Areo Portu, edifisiu Pontu Salele, residensia PAM no edifisiu publiku balu iha Covalima seidauk iha seguransa oinsa atu hodi asegura edifisiu sira tanba membru Seguransa DNSPP iha Covalima hamutuk ema na’in-80 deit lato’o atu kolokasaun.
Memberu Siguransa iha DNSPP iha Covalima, kompostu husi permanente ema na’in-38, ajente ajente ema na’in-44, husi total ema na’in-80 ne’e iha feto na’in-5 no mane na’in-75.
Jornalista : Julio Salinas
Editor : Chamot Nahac
