Covalima (RCCT) 17-06-25-Sekretaria Estadu Igualidade (SEI) liu husi Diresaun Nasional Politika Igualidade Jeneru, kapasita dadur sira iha Prizaun Suai konaba oinsa atu kontrola emosaun hodi hadok an husi krimi no violensia.
Diretóra Nasional Politika Igualidade Jeneru, Olga da Costa Monteiro, esplika atividade formasaun ba Prezu sira iha Prizaun ne’e hala’o kada tinan ho objetivu atu sensibiliza hodi eleva dadur sira nia koñesimentu konaba oinsa atu kontrola emosaun hodi hadok an husi krimi no violensia nune’e wainhira hetan liberdade labele komete tan eru ne’ebé antes sira halo ona.
“Atu hakbit no hasa’e sira nia kuñesimentu konaba kontrollu hahalok hirus ne’e rasik ho nune’e sira ne’ebé mak fila fali ba iha komunidade no sosiedade nia let atu labele kontinua no prevene violensia bazeia ba Jeneru atu labele kontinua tan iha ita nia sosiedade nia let ho ida ne’e mak Sekretaria Estadu ba Igualdade Kontinua kada tinan halo formasaun ba ita nia prizioneiru no prizioneira sira” Diretóra Nasional Politika Igualidade Jeneru, Olga da Costa Monteiro, esplika.
Diretór Prizaun Suai, Rui Gonçalves hatete formasaun ne’ebé realiza husi Sekretaria Estadu Igualidade ne’e interesante tanba liu husi informasaun ne’e hetan sai hanesan materia importante ba dadur sira hodi kontinua hala’o moris wainhira hetan liberdade husi pena ne’ebé sira kumpri.
“Agradese ba SEI ne’ebé mak esforsu ajuda ona servisu prisional suai atu oinsa prepara ita nia maun alin sira ne’ebé mak la’o sala dalan. Provisoriamente mai hela iha fatin ida ne’e, tanba ne’e ho asaun sira ne’ebé mak mai husi parseiru sira ne’e ita agradese tebes tanba ita presiza ko’alia ba malu ho esperansa katak buat sira ne’ebé ita ko’alia sira mos bele tau iha neon atu oinsa fila fali ba liur bele livre husi fatin ida ne’e, sira mos bele espresa ba iha komunidade ho maromak nia tulun iha futuru mai sira mos bele ajuda muda mos sira seluk atu labele mai nakonu iha Prizaun ne’e” Diretór Prizaun Suai, Rui Gonçalves, hatete.
Atividade formasaun konaba kontrola emosaun hodi hadok an husi krimi no violensia ne’e, SEI Realiza iha Prizaun Suai, partisipa husi dadur hamotuk na’in 35. Atividade ne’e hala’o durante semana ida hahu husi segudan feira no remata iha sexta semana ne’e.
Jornalista : Alfredo Barreto
Editor : Chamot Nahac
