Covalima (RCCT) 22-09-23–Sekretaria Estadu ba Igualdade (SEI), Elvina de Sousa Carvalho, hala’o enkontru ho grupu traballu jeneru Muniusipal no mos hasoru malu ho assosiasaun feto potensial sira iha Covalima,ko’alia konaba preparasaun eleisaun suku.

Iha Vizita ne’e mos Sekretaria Estadu ba Igualidade, Elvina de Sousa Carvalho enkoraza feto maluk sira iha Covalima, labele lakon oportunidade partisipa iha eleisaun suku ne’ebé sei akontese iha fulan Outubru Tinan ne’e.

“Ba Covalima hanesan vizita primeiru, ne’ebé halo hanesan membru governu, ohin ita mai ho atividade rua, ida halo enkontru ho grupu traballu jeneru municipal no segundu maka hasoru assosaisaun feto potensial sira ligadu ho preparasaun no enkoraza feto sira partisipa iha eleisaun suku” informa Sekretaria Estadu ba Igualdade, Elvina de Sousa Carvalho, iha salaun enkontru Administrasaun Munisipiu Covalima.

Governante ne’e haktuir halo enkontru ho grupu traballu jeneru municipal ne’e atu relata konaba programa nonu governu konstituisional nian, ne’e iha papel importante hodi asegura programa ligadu ho igualidade jeneru.

“Ita ko’alia ho grupu traballu jeneru ne’e ita fo sai programa prioridade husi nonu governu konstituisional nian, ita hatene katak grupu traballu jeneru municipal iha papel importante tebes atu bele asegu programa sira ligadu ho igualdade jeneru nian, liga ho empedoramentu feto inklui ho programa sira inkusivu tebes, ha’u hanoin atividade ida ne’e importante ” hatete Membru Governu da Sia ne’e.

Feto Covalima hatudu ona kapasidade bele lidera no fo ezemplu di’ak ba maluk feto husi munisipiu seluk, dehan SEI.

“Ha’u hanoin iha Covalima Xefe Suku feto sira ne’ebé hatudu sira nia kapasidade durante sira lidera ho di’ak tebes, sai mos hanesan ezemplu ba maluk feto sira husi munisipiu seluk” membru governu ne’e dehan.

Entertantu Sekretaria Estadu Igualdade, Elvina de Sousa Carvalho enkoraza maluk feto sira atu kandidata hodi bele sai lider komunitaria, tan ne’e husu mos povu Covalima, atu iha eleisaun suku mai, bele fihir no hili didi’ak sira nia xefe suku no mos fo oportunidade ba feto sira hodi lidera suku.