COVALIMA—–Komandante PNTL Munisípiu Covalima Superintendente, Polisia Basilio de Jesus, husu ba entidade hotu iha Munisipiu Covalima atu bele komprende konteudu setor seguransa hanesan setor determinante ida ba susesu eleisaun parlamentar 2023.
“Parte komando munisipiu ne’ebe nia responsabilidade ba iha asuntu seguransa, ohin mos hau esplika ona iha ita ninia sorumutu ida ne’e, ba xefe do postu, ba xefe suku, ba STAE, CNE inklui media no entidades hotu iha Covalima, atu bele komprende konteudu setor seguransa hanesan setor determinante ida ba susesu eleisaun parlamentar 2023” informa Komandante PNTL Munisípiu Covalima Superintendente, Polisia Basilio de Jesus, ba jornalista sira hafoin partisipa iha enkontru divulkasaun kona-ba prosesu eleisaun parlamentar 2023, ne’ebe organiza husi STAE Munisipiu Covalima, Tersa (09-05).
Komandante Basilio hateten hanesan komandante munisipiu iha ninia planu bazeia ba planu operasaun ne’ebe husi Komando Geral da PNTL ninia orientasaun hatun mai iha munisipiu, ida ne’e sai refrensia ona no halo ona ninia planu de seguransa ba iha eventu eleisaun parlamentar ne’ebe atu mai iha 21 de Maiu agora.
Komando PNTL Munisípiu Covalima trasa ona planu seguransa ba iha ida ne’e, fiar katak iha tinan 2022 kuandu bainhira iha eleisaun prezidensial Covalima iha 80 sentru votasaun no estasaun votusaun 92, agora mai fali iha eleisaun parlamentar tinan ida ne’e sei iha sentru votasaun 100, estasaun votasaun 120.
Oinsa maka polisia bele ezerse ninia funsaun hodi asegura seguransa ba iha sentru votasaun sira ne’ebe ejiste iha Covalima laran tomak.
Nia haktuir Polisia ninia papel maka ne’e hakarak ka lakohi tenke asegura masimu neim fo espasu ida ba se deit tantu individu ou grupu organizadu atu destroi establidade iha momentu eleisaun ida ne’e liliu ba iha loron 20-21 2023.
Komandante dehan polisia pursentu 100 fo garantia masimu ba iha asuntu seguransa, la fo espasu ba grupu se deit, ba I divide se deit iha tempu ne’eba, tanba ne’e maka hanesan komandante munisipiu hato’o ba nai xefe suku sira, xefe de postu sira, ba brigada sira husi STAE, CNE atu disiplina.
Komandante mos husu na entidades hotu tenke sai autor atu disiplina no tenke hala’o serbisu tuir regras ne’ebe iha.
“Ita fo samada atensaun ba joven sira no kualker ema, tanba iha loron 20 de Maiu ita sei halo distribuisaun ba material sensitive no laos sensitive ba iha sentru votasaun sira, metode sira ne’e preparadu ona husi STAE ho CNE, polisia nia papel maka oinsa iha 20 de Maiu depois de formatura ita halo konsolidasaun forse seguransa iha kampu formatura, liu tiha ida ne’e polisia komesa akompana material sira ne’e ba to’o iha sentru votasaun sira hotu” komandante haktuir.
Basilio garantia iha eleisaun parlamentar tinan ida ne’e sei laiha problema no sei la sai obstaktu maske menus rekursu, maibe menus rekursu ne’e sei la sai obstaklu ba iha ezerse funsaun serbisu polisial.
Papel polisia nian maka hanesan ohin dehan ona atu fo garantia seguransa masimu ba iha eleisaun ida ne’e, parte ne’ebe ohin temi ne’e la sai obstaklu ba ezerse funsaun hanesan ajente seguransa.
Hanesan ajente ba seguransa la haree ba obstaklu, maibe tente atu oinsa nafatin atu ultrapasa programa sira ne’e bele lao ho di’ak.(Azu)
