Covalima (RCCT) 21-09-23–Sekretariu Estadu Floresta (SEF) Fernandinho Viera Kinta ne’e halo vizita trab
allu iha Munisipiu Covalima ho atu hametin liña kordenasaun ho Autoridade Munisipal hodi tau matan ba asuntu importante balu liliu konaba ai kamelin iha liña.

Kasu lia ba Jornalista iha resinto Administrasaun Munisipiu Covalima, Sekretariu Estadu Floresta (SEF), Fernandinho Viera, informa konaba objetivu vizita Covalima atu halo liña kordenasaun ho Autoridade Munisipal para tau matan hodi minimiza transaksaun illegal ba ai kamelin iha liña fronteira.

“Objetivu vizita Covalima mai halo lina kordenasaun ho autoridade lokal sira konaba haree oinsa atu minimiza ita nia transaksaun illegal sandalo iha area fronteira no haree mos kona ba ema tesi ai kamelin illegal ne’ebé akontese iha munisipiu sira ne’ebé area fronteira” informa Sekretaria Estadu Floresta Kinta (21/09)

Sekretaria Estadu Floresta manifesta katak Covalima iha potensialidade ba area industria ai teka, tan ne’e iha futuru atu servisu hamutuk ho autoridade hodi rekolla ai teka sira iha Covalima.

“Ha’u informa ba administrador munisipiu Covalima katak Covalima hanesan rai ida ne’ebé potensia ba area industria ai teka nian no mos ai floresta nian hahu kedas iha tempu okupasaun Indonezia, tan ne’e mak hau mai kordena oinsa ba oin ita komesa rekolla ai teka ne’ebé iha Munisipiu Covalima atu nune’e hodi bele fo benefisia ekonomia ba ita nia povu liliu ba komunidade Covalima” nia dehan.

Administrador Munisipiu Covalima Francisco de Andrade haktuir vizita Sekretariu Estadu Floresta Fernandinho Viera,hodi haklean relasaun servisu ho autoridade iha munisipiu nune’e hodi prezerva ai kamelin no ai teka iha Covalima.

“Sekretaria Estadu Floresta nia vizita ne’e hanesan vizita kortejia ida atu hodi hatene relasaun servisu entre floresta ho autoridade iha munisipiu ne’e oinsa, alende ida ne’e koalia mos kona ba riku soin sira ai teka, ai kamelin ne’ebé uluk ema temi dehan Hutan Tanaman Industria (HTI) no politika governu liu husi floresta atu estadu bele koa fali hodi hatama reseitas, ohin hau mos hato’o katak durante ai kamelin barak ona ema naok” informa administrador.

Entertantu Administrador Munisipiu Covalima Francisco de Andrade rekomenda ba governu liu husi Sekretariu Estadu Floresta Fernandinho Viera atu Garantia riku soin floresta nian hanesan ai kamelin no ai teka iha fronteira para ema labele na’ok no tesi arbiru, governu tenke tau prioridade hadi’a uluk estrada iha fronteira atu nune’e fasilita polisia no forsa sira ne’ebé destaka iha fronteira bele halo kontrolu mazimu iha liña fronteira.