Manufahi (RCCT) 27-10-23-Sekretaria Estadu Dezenvolvimentu Lokal (SEDL), simu responsabilidade hodi observa eleisaun orgaun suku ba periudu 2023-2030 iha Munisipiu tolu.
Sekretariadu Estadu Dezenvolvimentu Lokal, Mateus dos Santos Talo, hatete hafoin simu orientasaun husi Ministru Administrasaun Estatal (MAE) toma responsabilidade ba Munisipiu tolu hanesan Munisípiu Covalima, Ainaro no Manufahi hodi halo fiskalizasaun preparasaun tekniku ba eleisaun orgaun suku 2023.
“Bazea ba instrusaun husi MAE ekipa ne’ebé ha’u lidera hanesan Sekretaria Estadu Dezenvolvimentu Lokal hala’o fiskalizasaun ba preparasaun teknika eleisaun suku ninian, ohin loron tomak hahu husi Munisípiu Covalima, Ainaro no Manufahi hodi haree besik liu konaba preparasaun teknika hodi realiza eleisaun suku iha Munisipiu-3 ne’e” informa SEDL Mateus dos Santos Talo ba jornalista iha sentru votasaun Aldeia Turon, Suku Babulu, Postu Administrativu Same, Munisípiu Manufahi, Sesta feira ne’e.
SEDL Mateus dos Talo afirma durante loron tomak halo observasaun iha terenu ba sentru votasaun sira hahu husi Covalima to’o Manufahi, preparasaun hotu la’o di’ak, maske iha sentru votasaun balun mak infrenta kondisaun fatin ladun di’ak.
“Iha rezultadu fiskalizasaun iha terenu, ha’u hanoin maioria la’o ho di’ak, preparasaun di’ak so ke iha fatin ida ka rua sentru votasaun iha sede aldeia balun ninia kondisaun ladun di’ak, maibe ita orienta fo instrusaun para depois prepara ho diak ba loron aban eleisaun orgaun suku nian” nia hatete.
Sekretaria Estadu husu ba komunidade tomak iha Munisipiu Covalima, Ainaro no Manufahi hotu-hotu partisipa iha festa demokrasia ida ne’e hodi hili ida-idak nia xefe suku no xefe aldeia sira.
“Husu ba ita nia komunidade tomak liliu ba munisipiu tolu ne’e para atu partisipa masimu loron importante ida ne’e tanba ita hotu hatene suku sai hanesan unidade Administrasaun ki’ik ida iha ita nia sistema Administrasaun hodi nune’e husu ba ita nia komunidade partisipa hodi hili ita bo’ot sira nia lideransa ne’ebé sei lidera ita boot sira iha nivel suku nian durante tinan 7” nia haktuir.
Administrador Postu Administrativu Hato-Udu Rosalino Soares Mendes, hatete iha Postu Administrativu Hato-Udu hamutuk sentru votasaun 16, no hahu dader to’o lokraik distribuisaun material sensitivu no la’os sensitivu la’o ho susesu, nia mos husu ba komunidade atu hotu-hotu partisipa hodi fo votus ba kandidatu suku no aldeia sira ne’ebé kompete iha eleisaun ida ne’e.
“Ita nia postu administrativu Hato-Udu kompostu husi suku 2, aldeia aldeia 16, tanba ne’e iha sentru votasaun 16 kada aldeia, no distribuisaun ba material sensitive no la’os sensitive la’o hotu ho normal no susesu, ha’u rasik tun direita ba iha terenu ho matan haree katak la’o ho di’ak, tan ne’e nia mos husu ba komunodade tomak iha Hato-Udu, iha suku rua no aldeia 16 katak iha loron aban ne’e husu ita bo’ot sira nia partisipasaun atu hakbesik an ba sentru votasaun ida-idak ne’ebé ita fazparte ba atu nune’e bele ezerse ita bo’ot nia direitu iha festa demokrasia ida ne’e ho livre laiha ema ida maka halo sai impedementu ba ita bo’ot sira no ezerse direitu tuir ita nia konsiensia rasik hodi fo votus konfiansa ba kandidatu sira ne’ebé imi rasik fihir ba lideransa ida ne’ebe ita boot sira hakarak” nia dehan.
Entertantu SEDL Mateus dos Santos Talo hafoin tun direita ba terenu liliu ba iha sentru votasaun sira husu ba Ofisial Supervizaun Eleitoral (OSE), Pesoal STAE Apoiu Aldeia (PSAA) no parte seguransa labele joga karta, hemu iha fatin sentru votasaun no husi karik buat ruma naksalak lalais kontaktu ba iha autoridade kompetensia sira.
Jornalista : Julio Salinas
Editor : Chamot Nahac
