Covalima (TCCT) 12-03-25- Sekretariu Estadu Dezenvolvimentu Lokal (SEDL), Mateus dos Santos Tallo, husu Administrador Postu Administrativu (APA) no Lideransa Komunitaria (LK) sira iha Covalima atu kontrola komunidade sira labele hari uma iha espasu publiku basa dadaun ne’e governu liu husi Ministeriu Planeamentu Investimentu Estratejiku (MPIE) elabora hela ba planu urbana.
Governante ne’e mos informa katak Parlamentu Nasional (PN) mos Aprova ona Lei Tutela Balistika nune’e Ministeriu Administrasaun Estatal (MAE) hein promulgasaun husi Prezidente Republika molok halo sosializasaun ba Komunidade sira.
“Lei Tutela Balistika ne’ebé aprova ona iha Parlamentu Nasional, tan ne’e tempu badak ita sei sosializa lei ne’e, labele autoriza ema halo uma arbiru. Ministeriu Planeamentu Investimentu Estratejiku (MPIE) iha ona faze elaborasaun ba planu urbanu ho lian Indonezia dehan tata ruang kota. La hatene imi halo ona mapamentu agrikola ka lae?, rai sira ne’ebé potensia ba natar, Xefe Suku sira fabor hare ida, tanba imi maka besik liu ba povu, labele fa’an no labele naran halo uma arbiru, setor sira ne’ebé importante ita labele prioritiza, ha’u dehan tan dala ida lei ne’e aprova ona iha PN hein promulgasaun husi Prezidente Republika, ita sei sosializa” dehan Sekretariu Estadu Dezenvolvimentu Lokal (SEDL), Mateus dos Santos Tallo, iha nia intervensaun hafoin loke abertura ba konsulta sidadania ba autoridade sira ne’ebé hala’o iha Salaun Administrasaun Munisipiu Covalima Tersa (11/03).
Nudar Lideransa Komunitariu, Xefe Suku Debos, Agustinho da Silva relata, durante ne’e sempre halo kontrolu ba komunidade no fahe informmasaun atu komunidade labele fa’an rai arbiru no labele hari uma arbiru iha fatin ne’ebé konsidera risku ba dezastre.
“Ha’u nia komunidade sira ne’ebé iha Suku Debos laran ne’e sira balu halo uma iha fatin risku, liliu hanesan iha mota ninin, foho hun, ida ne’e ha’u rasik mos antes sira hari uma ha’u sempre fo hanoin ba sira katak fatin ida risku ne’e ita labele hari uma ba, se wainhira akontese udan bo’ot ita bele hetan dezastre rai bele monu no mota bele sa’e hodi estraga hotu uma depois halo ita sai vitima, ha’u hanoin komunidade sira ne’ebé iha Lakonak Besik, depois mai iha Asu Maten, iha Lo’okeu Foho sira ne’e maka sempre hari uma iha fatin sira ne’ebé risku” dehan Xefe Suku Debos.
Enkuantu Sekretariu Estadu Dezenvolvimentu Lokal (SEDL), Mateus dos Santos Tallo, dehan Governu iha Pozisaun atu halo dezenvolvimentu, baze legal iha, tan ne’e wainhira komunidade la kopera hodi kontinua hari uma okupa espasu publiku no area risku ba dezastre mak, Governu liu husi SEATOU sei foti asaun ba asuntu refere.
Jornalista : Julio Salinas
Editor : Chamot Nahac
