Covalima (RCCT), 18 Setembru 2026 — Sekretariadu Estadu Dezenvolvimentu Lokál (SEDL), akompaña husi Prezidente Autoridade Munisípiu Covalima, Miguel Armada Cardoso, hamutuk ho estrutura relevante sira, distribui nesesidade bázika ba família vulnerável 20 iha Postu Administrativu Fatululik, Munisípiu Covalima.
Sekretáriu Estadu Dezenvolvimentu Lokál, Mateus dos Santos W. Tallo, hateten katak apoiu ba família vulnerável sira ne’e nu’udar parte husi kompromisu Governu nian atu asegura katak komunidade sira ne’ebé iha kondisaun vulnerável bele hetan apoiu nesesáriu.
“Distribuisaun nesesidade bázika ba família vulnerável sira ne’ebé identifika husi servisu munisipál relevante sira ne’e nu’udar ida husi objetivu Governu nian, atu asegura katak ema sira ne’ebé presiza hetan apoiu,” hateten Mateus dos Santos W. Tallo iha nia diskursu, hafoin entrega apoiu ba família sira.
Nia hateten katak Governu, liuhusi programa dezenvolvimentu no protesaun sosial, sei kontinua fó atensaun ba komunidade, liuliu família sira ne’ebé hasoru situasaun vulnerabilidade.
Iha oportunidade ne’ebá, Administradór Postu Administrativu Fatululik, Felix Vicente, klarifika katak joven sira ne’ebé simu apoiu iha atividade ne’e la’ós benefisiáriu diretu, maibé reprezenta família vulnerável sira ne’ebé labele partisipa diretamente.
“Ha’u hakarak klarifika katak nesesidade bázika sira ne’e la’ós distribui ba joven sira, maibé joven sira reprezenta de’it família vulnerável sira ne’ebé labele mai diretamente,” nia esplika.
Nia hateten katak família sira ne’e identifika bazeia ba sira nia kondisaun no nesesidade, nune’e presiza hetan apoiu husi Governu.
Prosesu identifikasaun família vulnerável sira hala’o liuhusi lider komunitária, ne’ebé fó informasaun kona-ba família sira ne’ebé presiza apoiu.
Nesesidade bázika ne’ebé distribui ba família sira inklui foos, supermie, mina-goreng, kafé, masin midar, susu, sabaun no rinso.
Jornalista: Paul Mandeu
