Iha observasaun ne’e SEATOU, Germano Santa Britis Dias, husu ba negosiante sira ne’ebé durante ne’e okupa espasu publiku hodi halo negosiu atu kopera ho governu hodi hamamuk fatin refere.
“Ohin lokraik ne’e kontinua mai hare espasu publiku liliu iha merkadu laran no estrada bo’ot sira ne’e, ne’ebé ita nia vendedor sira okupa hodi fa’an mina, loke loja, no loke kioske, sasan mai tau iha liur, mai ko’alia ho sira, para sira rasik bele koopera no muda rasik sasan sira ne’e mai hotu iha laran, para husi estrada mamuk no luan bele halo transporte publiku hanesan kareta ho motorizada bele halo movimentu ba mai livre, no husu ba sira mos tenke kuidadu lixu iha baleta kuak sira, no ita husu atu sira hamos rasik baleta atu nune’e udan karik bee bele la’o tuir nia dalan” informa Sekretariu Estadu Toponomia no Organizasaun Urbana (SEATOU) Germano Santa Britis Dias, ba jornalista sira iha Merkadu, Debos, Suai.
Vendedor Oscar Moniz Lobato la aseita Governu liu Husi SEATOU atu muda ninia kioske iha merkadu debos Suai, tanba durante ne’e nia selu arendamentu ba estadu kada fulan hahu kedas iha tinan 2012 to’o agora.
“Hau selu pajak ba estadu hahu iha tinan 2012 mai to’o ohin loron, maibe kuandu SEATOU mai sobu ne’e ha’u la aseita, ha’u kada fulan selu taxa ba estadu liu husi Banku Nasional Ultramarino (BNU) ho montante osan dolar Amerikanu rua sentavos lima nulu ($ 2.50), maibe fulan tolu maka ha’u foin ba selu dala ida Dolar Amerikanu hitu sentavos lima nulu ($ 7.50)” nia dehan.
Maske nune’e Sekretariu Estadu Toponomia no Organizasaun Urbana (SEATOU) Germano Santa Britis Dias, nafatin alarma ba vendedor sira tenke hamamuk fatin publiku sira labele loke branda kioske nian tama to’o iha estrada laran lo labele taka baleta kuak sira, kuandu la halo tuir no kontinua utiliza espasu publiku sira maka SEATOU sei tun tan mai iha Covalima hodi dudu ka sobu hotu.
Jornalista : Julio Salinas
Editor : Chamot Nahac
