Covalima (RCCT)12-10-23—Governu liu husi Sekretaria Estadu Arte no Kultura (SEAK)fo formasaun ba estudante sira iha Eskola Secundaria Geral Publiku (ESGP) Suai hodi hasa’e kapasidade no kualidade iha mundu arte nian.

Reprezentante Administrador Munisipiu Covalima Jacinto dos Santos, husu ba estudante sira atu foku ne’e bele komprende konaba arte.

“Nasaun ida ne’e importante ba jerasaun foun sira liu liu imi na’in hira maka tuur ne’e atu partisipa formasaun ne’e konaba arte ninian, imi nurak sira jerasaun foun ema dehan jerasaun kontinuador, purtantu formasaun durante loron 4 ne’e ha’u hameno atensaun didiak ho materia sira ne’ebé formador sira sei aprezenta, atensaun para bele akapta, grava materia hirak ne’e imi lori fila ba uma ne’e hanesan matenek ida, bukae ida ba imi atu lori imi ba futuru” informa Reprezentante Administrador Munisipiu Covalima Jacinto dos Santos.

Diretor Geral Arte no Kultura Manuel Ximenes Smith, hateten papel arte kultura atu habelar nia politika ba komunidade tomak liliu ba jerasaun foinsa’e sira.

“Papel arte kultura atu habelar nia koñesimentu, atu habelar nia politika ba iha komunidade tanba arte kultura nia relasaun hotu ho komunidade, komunidade ne’ebé mak ba iha komunidade kultural ita nia inan soru na’in sira, ita nia aman lia na’in sira, komunidade amigu kultura sira maka ita nia juventude sira foin atu kuñese mundu artistiku no mos transmite ita nia koñesimentu ba ita nia foinsa’e sira atu kuda netik lia fuan ida kona ba prezerva salva guarda, valoriza ita nia valor kultura ne’ebe hatete maka bei ala sira nia liman rohan husik hela mai jerasaun foun iha rai doben ida ne’e” dehan Diretor Geral Arte no Kultura Manuel Ximenes Smith.

Xefe Gabinete Eskola Secundaria Geral Publiku Suai, Calistro Gusmão, husu ba estudante sira atu aproveita tempu durante loron 4 ne’e halo di’ak tanba formasaun ne’e hanesan bukae ida ba imi foin sae sira atu bele hatene klean liu tan kona ba arte no kultura ninian.

“Sekretaria estadu arte no kultura nia prezensa durante loron 4 nia laran ami nia estudante sira partisipa iha formasaun ida ne’ebe maka hakerek hela iha ne’eba hanoin importante tebes ba estudante sira ne’ebe ho tema hasae kapasidade no kualidade iha mundu arte nian, tan ne’e husu ba estudante sira aproveita tempu loron 4 ne’e ho didiak no tenke tuir to’o hotu” nia husu ba estudante sira

Entertantu Sekretaria Estadu Arte no Kultura hala’o formasaun durante loron 4 nia hahu tersa no remata iha Sesta ohin, formasaun ne’e hala’o iha salaun enkontru ESGP Suai hetan partisipasaun maioria husi estudante desimu ano ESGP.