RAIMEA—-Ministeriu Agrikultur no Peskas liu husi Projetu SAPIP distribui hand trator hamutuk unidade-16 ba grupu agrikultores sira iha Aldeia Beilaku, Suku Raimea, Postu Administrativu Zumalai, Munisipiu Covalima, Kuarta (01/02).
Diretóra Geral MAP, Maria Odete do Ceu Guterres, husu ba grupu agrikultor sira atu kuidadu sasan sira ne’ebe governu fornese liu husi SAPIP, grupu sira tenke prganiza malu hodi tau matan ba sasan hirak bele uza to’o tempu naruk.
“Dala ida tan hau husu ba ita boot sira atu iha responsabilidade masimu, kuidadu sasan sira ne’ebe governu fornese liu husi SAPIP tenke ser iha rasa memiliki sente katak sasan ne’e hau nian, grupu sira organiza malu ba para kuidade sasan sira ne’e halo didiak utiliza masimu hodi hasae produsaun” deklara Diretóra Geral MAP, Maria Odete do Ceu Guterres, iha nia diskursu hafoin distribui hand trator hamutuk unidade-16 ba grupu agrikultores sira iha Beilaku, Suku Raimea, Kuarta (01/02).
Nia mos husu ba grupu agrikultor sira nia vintade atu serbisu hamutuk ho project officer munisipiu nian atu nune’e buat hotu bele lao diak.
“Hau mos hakarak husu ita boot sira nia vontade atu kopera ho ami nia project officer ne’ebe serbisu iha ne’e, dala ruma ba iha Dili atraza bar-barak ami hirus fali project officer tanba sa maka ema nia lista la mai, tanba sa mak relatoriu laiha, mas hau haree ho matan katak laiha kontribuisaun husi ita boot sira, ita boot sira hanesan benefisariu tenke kolabora ho Project officer (PO) iha Covalima nian” nia informa
Reprezentante Administrador Munisipiu Covalima Francisco Mendonca “Tatamero” agradese ba governu liu husi MAP, tanba programa governu nian la para sempre hanoin nia povu hodi oferese trator ba grupu agrikultor sira iha rai Covalima.
“Agradese ba ita nia oitavu governu liu husi MAP, programa governu nian la para hakarak dehan ita hotu hatene desde primeiru governu to’o ohin loron trator ho had trator ne’e husi goveenu sempre fahe, ita mos agradese ba SAPIP ne’ebe serbisu hamutuk nudar parseiru governu nian hodi fornese material sira hanesan makina hand trator ba grupu benefisariu sira” nia dehan.
Nia hatete objetivu governu nian oferese trator ba komunidade atu hodi hasae produtividade agrikutura, tanba kuandu temi dezenvolvimentu jeral ne’e iha planu estratejiku dezenvolvimentu nasional ho mos planu estratejiku dezenvolvimentu munisipal.
Iha munisipiu halo elaborasaun ba planu estratejiku dezenvolvimentu agrikutura munisipal mos iha vizaun no iha misaun, ne’ebe hala’o pilar 4 ba dezenvolvimentu hanesan pilar primeiru kapital sosial, kapital infraestrutura, kapital dezenvolvimentu ekonomiku no ida seluk maka kapital dezenvolvimentu institusional.
“Agora foku liu ba iha kapital dezenvolvimentu ekonomia, intensaun husi ita nia governu hakarak hasai povu husi kiak no mukit, misaun mak ita hala’o daudauk ne’e, tanba ko’alia kona ba ekonomia baze fundamental ne’e mak agrikultura, tanba ne’e husu ba imi grupu agrikultor sira simu ona hand trator ne’e kuidadu didiak hodi dezenvolve ita nia agrikultura liliu halo to’os ho natar” nia hateten.
Ofisiál Projetu SAPIP, Munisipiu Covalima Leonito do Nasimento, informa MAP liu husi projetu SAPIP nian iha Covalima ohin disteibui hand trator makina hand trator hamutuk unidade-16 ba grupu 16 iha Suku Raimea.
“Ministériu Agrikultura no Peska liu husi projetu SAPIP hamutuk ho ita nia autoridade iha Covalima ho reprezentante MAP nian ita halo distribuisaun hand trator unidade-16 ba grupu benefisariu 16 iha Suku Raimea, ne’ebe durante projetu SAPIP akompana no halo prosesu ba sira nia produsaun” nia informa.
Nia dehan, total hand trator sira ne’e distribui ba grupu 16, iha Aldeia Loro hand trator-4, Aldeia Uma Klaran hand trator-5, Aldeia Beilaku hand trator-6 no Aldeia Oebaba hand trator-1.
Total benefisariu ne’ebe sei implementa atividade halo natar bazeia ba hand trator-16 ne’ebe ohin halo ona distribuisaun ba grupu ida-idak benefisariu hamutuk ema na’in-272 halo atividade natar ninian no luan area natar hektares-520 ne’e haree liu atividade natar ninian iha suku Raimea.
Fundus ne’ebe maka SAPIP aprova total hamutu $ 207, 677. 50 ne’e ba fundus ki’ik ne’e halai liu ba atividade halo natar nian no atividade kuda ai oan,iha teknolojia post koilete nian SAPIP sei sosa tan makina rongtok hare no ekipamentu seluk, tanba planu sei sosa mqkina rongtok ne’e iha unidade-32 no tempu tuir mai sei entrega ba grupu agrikultor sira, makina rongtok hare ne’e hamutuk ho ekipamentu seluk orsamentu ne’ebe aprova no tama ona ba iha bankaria munisipiu nian hamutuk $ 33,600.00 ne’e hein deit foti no ezekuta.
Husi trator unidade-16 ne’ebe ohin distribui ona ne’e orsamentu ba iha trator ne’e rasik kada trator ida ho folin $2.400,00 ne’e inklui kompañia fornesedor transporta mai to’o iha grupu ida-idak nia fatin, tanba ne’e hand trator unidade-16 ho nia folin hamutuk $ 38.400,00.
Nia dehan alende SAPIP entrega hand trator unidade-16 entrega mos mina gazoel (solar) litru-8.160 ne’e entrega tiha ona ba membru grupu ida-idak.(Azu)
