Covalima (RCCT) 30-04-25-Raes Hadomi Timor Oan (RHTO) ejiste iha Covalima atu apoiu fundus ba ema ho difisiensia (EhD) tuir programa ne’ebe iha hodi tulun EhD sira utiliza hodi trata sira nia dokumentu ne’ebé persija.
Pontu Fokal RHTO Munisipiu Covalima, Rosito Amaral, hatete hahu husi fulan Janeiru to’o Abril ne’e RHTO tulun ona EhD hamutuk na’in-5 hodi halo tratamentu ba sira nia dokumentus para nune’e bele fasilita asesu ba subsidiu husi governu.
“Janeiru ate Abril ne’e ba sira nain lima no mos ba ita maluk difisiensia sira ne’ebé mak hanesan ami la apoiu mos sira prontu la’o hamutuk ho ami trata sira nia dokumentus atu nune’e sira bele asesu ba subsidiu husi governu, hanesan trata atestadu mediku, eleitoral, Billete Identidade (BI) ne’e ba sira, hahu husi janeiru to’o abril ne’e ba nain haat ne’ebé total ne’e sira na’in sia, sira na’in lima maka ami fo fundus no sira na’in hat ami la fo apoiu fundus tanba ami apoiu fundus tuir ami nia programa ne’ebé mak iha exemplu iha janeiru ate Marsu ne’e ba sira na’in ida, depois Abril ne’e mak ba sira nai tolu” nia informa.
Pontu Fokal RHTO Munisipiu Covalima ne’e subliña mekanismu atu fo apoiu fundus ba EhD tenki halo liu husi asesmentu hodi bele serteja ho kondisaun ne’ebé sira EhD sira infrenta.
“Mekanismu atu apoiu fundus ba sira primeiru ves ami tenke ba halo asesmen no ami hare mos maluk difisiensia sira nia kondisaun maizumenus sira tama ba iha klasifikasaun ba idosos nian ita bolu grau I, II, III to’o IV no ami biasa foti ita nia maluk difisiensia ne’e hare ba sira nia kondisaun no ami bele hare katak ho sira bele tama ba iha grau 3 ou 4 entaun ami prontu bele lori sira ba hasai atestadu mediku , no konaba orsamentu bele iha mudansa tamba dala ruma kada fulan ami apoiu fundus ba ita nia maluk difisiensia trata dokumentus ne’e kada fulan dala ruma na’in ida dala ruma ni’an rua no dala ruma mos na’in tolu maibe kada pesoal ida ami apoiu osan Dolar Amerikanu hitu nulu resin lima ($ 75,00)” nia dehan.
Pontu Fokal RHTO Munisipiu Covalima Rosito Amaral esplika katak Programa RHTO halo referal ba maluk difisiensia sira atu bele trata sira nia dokumentus hanesan atestadu hodi asesu ba subsidiu husi governu liliu insentivu konaba bolsu estudu nian hahu husi nivel eskola primaria to’o ensinu sekundaria.
Jornalista : Julio Salinas
Editor : Chamot Nahac
