Covalima (RCCT) 21-04-23 komandante PNTL Munisípiu Covalima Superintendente Basilio de Jesus, atu garantia seguransa iha Munisípiu Covalima maibe haree ba membru polisia maka sei limitadu tanba ne’e husu ba povu Covalima atu hakilar ba iha governu hodi halo rekrutamentu ba membru polisia.
“Ita nia membru maka araska agora atu hodi desloka ba fatin sira ne’ebe identifika atu hodi fo seguransa ba militante partidu politiku sira nian liu hodi partisipa iha kampana eleitoral, tanba ne’e husu povu Covalima oan hotu hakilar oinsa governu bele aprova dekretu rekrutamentu ba membru polisia, kuandu imi tuur nonok deit oinsa governu bele rekruta membru polisia foun” informa Komandante PNTL Munisípiu Covalima Superintendente Basilio de Jesus iha nia intervensaun hafoin partisipa iha enkontru kordenasaun entre CNE no STAE ho autoridade lokal sira ne’ebe hala’o iha Salaun enkontru STAE Munisipiu Covalima Kuarta (19/04).
Komandante afirma tinan hira ona governu halo rekrutamentu ba membru F-FDTL, maibe ba rekrutamentu polisia laiha, tan ne’e to’o ohin loron membru polisia sei limitadu, tanba ne’e kada postu eskuadra ida iha deit membru polisia na’in-7.
Nia dehan ho membru polisia limitadu sai preokupasaun bo’ot ba ema hotu, ezemplu se iha postu administrativu Fatumea membru peletaun ida iha membru na’in-30 minimum na’in-21 ne’e komando munisipiu bele orienta kedas membru sirabhusi Fatumea bele mai to’o iha Tilomar, mas kuandu ema laiha atu haruka se loos.
“Se kuandu membru iha postu eskuadra ida ema laiha ita atu haruka se loos, husi Fatumea mai to’o iha Tilomar, hein iha fatin ne’ebe atu ema halo movimentu liu ba mai membru iha ne’e la susar buat ida, maibe ema laiha ita atu haruka se loos, se ita haruka membru husi Fatumea mai fo seguransa iha rule ne’ebe ema atu liu, Fatululik, Maucatar signifika labele foti fali membru ida husi fatin seluknida mai apoiu ba fatin seluk ne’e defisil tebes” nia hateten.
Nia sublina komandante sira Fera ulun atu responde ba buat sira ne’e ho masimu maibe labele duni, maibe se labele ona tenta husu koperasaun ba nai ulun sira, husu koperasaun ba nivel suku, xefe aldeia, konsellu suku apoiu oinsa maka eduka militantes partidu sira lao tuir dalan hakmatek, uza linguajen hodi educative atu nune’e labele provoka sira seluk ne’ebe lao tuir dalan.
Komandante polisia munisipiu ne’e iha esperansa sei fo avizu ba aldeia, ba suku atu mantein ho prinsipiu katak hotu-hotu tenke sai na’in ba Covalima, Covalima hotu-hotu nia kontribuisaun ne’e espera, estadu espera, autoridade espera ne’e maka bele, se la ho nune’e mai ho konfrontu fila ho konfrontu entaun se loos maka sai na’in ba rai ida ne’e.
Nia dehan se ema hotu sente sai na’in ba rai ida ne’e polisia la presija kolen, tanba mesak maun alin deit maske difrente idolojia politika, partidu difrente mas ema ida deit, objetivu ida deit atu dezenvolve rai ida ne’e, tanba ne’e husu ba ukun na’in sira, xefe suku, xefe aldeia labele eduka labarik sira mental negativu, maibe tenke hatoman an eduka joven sira sai joven ida ne’ebe nakonu ho sentidu ida katak nia sai na’in ba rai ida ne’e maka bele.(JS)
