Covalima (RCCT) 19-04-24-Ho adaptasaun no atu halo redusaun ba impaktu mudansa klimatika. Organizasaun Naun Governamental (ONG) Belun lansa kuda ai oan iha Aldeia Busada’o Suku Belekasak, Postu Administrativu Maukatar, Munisipiu Covalima.
Jestor Programa iha ONG BELUN Romaldo Caetano hateten, Komunidade persija kuda ai horis hodi konserva bee atu labele menus iha tempu bailoro no mos konserva natureza hodi labele hamosu dezastre naturais.
“Programa ida ne’e inisiativa husi komunidade husi Aldeia Busada’o ninian, sira iha grupu ida, ne’ebé ba ko’lia ho BELUN hodi bele suporta ai oan. Objetivu husi atividade ida ne’e oisa atu bele ajuda komunidade proteze rai, tanba agora ne’e mudansa klimatika ne’ebé afeita tebes ba iha ema hotu hotu, entaun ida ne’e hanesan atividade ida oinsa atu bele minimiza mudansa klimatika, ninia impaktu ba iha komunidade no ai ne’ebé maka ami fornese ba sira maka hanesan Saburaka, Bua, no Au, Au sei kuda ba iha fatin sira ne’ebé mak hanesan rai halai no be matan, no Saburaka, sira seikuda iha sira nia uma oin ho objetivu katak maski la fo rendimentu iha tempu badak maibe sei bele ajuda sira hodi hadi’a sira nia ekonomi iha futuru, la barak liu maibe sira bele hetan ninia rezultadu positivu” Romaldo Caetano hatete.
Iha fatin hanesan, Xefe Suku Belekasak, Leonito Gusmão, Enkoraza komunidade sira iha Aldeia Busada’o tenki kuidadu didi’ak no kosidera sai na’in ba Ai Oan ne’ebé Parseiru Dezenvolvimentu ONG BELUN ba komunidade sira.
“Ai ne’ebé mak ita nia NGO Belun distribui mai ita, ita tenke kuidadu animal labele besik no lutu tenki iha, lutu tenki hale’u Aldeia no lutu hale’u aihoris ne’ebé mak ita kuda para ai horis ne’e bele fo valor ba ita iha future” Xefe Belekasa, Leonito Gusmão, Salienta.
Iha fatin hanesan, reprezentante komunidade Aldeia Busada’o, Samuel Amaral, Salienta ho aihoris ne’ebe ONG Belun bele hamatak naturaza iha Aldeia Busada’o tan ne’e nia lansa komitmentu sei asegura aihoris ne’ebé Kuda ona.
“Ai Oan sira ne’e husi ONG Belun fo ami ne’ebé ai oan sira ne ami sei kudadu depois ami mos sei tau rai metan halo subur di’ak, depois halo lutu, iha aldeia busada’o ne’e lutu keliling tia ona maibe ami sei halo tan lutu ki’ik oan ba saburak sira nia hun depois kuidadu nafatin to’o nia bo’ot no to’o tempu koilleta mak ami foin koilleta” nia salienta.
Entretantu Tipo Aihoris ne’ebé distribui husi ONG Belun ba Komunidade aldeia Busada’o mak hanesan Saburaka hun Atus rua lima nulu, Bua hun atus tolu resin, no Au hun atus rua lima nulu, Enkuantu Aktividades ne’e implementa tanba ONG Belun hetan Apoiu Fundu husi Ajensia Internasional UNDP,
Jornalista : Moichung
Editor : Chamot Nahac
