Covalima (RCCT)05-07-23–Relasiona ho erosaun ka rai halai ne’ebe akontese iha Suku Zulo, Postu Administrativu Zumalai, iha loron 4 fulan Jullu 2023 rezulta uma kain 167 no uma lisan hamutuk 44 hetan estragus.
Tuir vitima Smith Cardoso Amaral konta dezastre ida ne’e mosu tanba hahu kedas iha loron domingu meudia akontese udan boot la para to’o iha tersa loro kraik tukun 6 otl akontese dezastre ida hanesan ne’e.
Xefe Suku Zulo João Lopes de Carvalho esplika ho akontesementu rai halai implika maka’as tebes ba komunidade nia uma hamutuk 100 resin no uma lisan 44 iha suku Zulo kompostu husi aldeia 4 maka sai vitima ba dezastre ida ne’e.
Komandante Operasional Autoridade Protesaun Sivil Munisipiu Covalima Flavio dos Santos Mendes hatete hahu kedas iha segunda halo levantamentu dadus ba vitima sira ne’ebe hetan dezastre iha Covalima liliu ba inundasaun ho rai halai.
Entertantu relasiona ho udan durante semana ida resin ona iha Covalima hamosu inundasaun no rai halai hodi rezulta komunidade nia uma hetan estragu no uma lisan sira inklui rezulta fasilidade publiku sira hanesan ponte Rai Ketan no Poste Komea kotu total no ponte kiik balu oras ne’e ameasa kotu, nune’e mos oras ne’e daudaun ekipa Komisaun Jestaun Risku Dezastre tun direita ba terenu hodi foti dadus risku dezastre.
Jornalista JS
Editor CN
