Covalima (RCCT)-07-04-2021 Relasiona akontesimento udan no anin bo’ot durante semana kotuk iha fatin hotu-hotu, inklui iha Municipio Covalima, maka iha Loron Sabado Semana kotuk (03-04-21) hamosu rai halai nebe rezulta Familia ida tenki lakon nia hela fatin (Uma) iha Aldeia Hatu Suco Holpilat Posto Adminstrativo Maukatar.
Familia Vitima Amaro Gusmão esplika ba Jornalista RCCT, Akontesimento ne’e akontese bainhira udan no anin bo’ot iha Loron Sabado Semana kotuk (03-04-21) mais ou menus iha tuku 8:40 kalan, hodi rezulta ninia uma monu, tanba mahon sira hela ba la iha ona, Amaro mos dehan ho akontesimento ne’e la rejulta ema ruma kanek maibe ninia uma mak monu halo nia ho ninia familia tenki lakon ninia hela fatin.
“ Rai halai ne’e akontese iha dia 03 fulan Abril, iha momento neba udan ho anin mos bo’ot, depois akontese iha tuku 8 kalan, depois ha’u hare sementi nebe maka nahe iha laran ne’e nakfera hotu e airin rua tohar hotu, maibe ami ida mos la kanek, tamba ne’e ami labele hela ona iha ne’e, agora ha’u ho nia oan sira hela fali iha kios ki’ik oan ida, nebe ha’u sente triste tebes tamba uma ne’ebe maka ami hela agora monu tiha ona ” Amaro Gusmão informa iha Fatin akontesimentu, Tersa feira (06-04)
Tamba ne’e Vitima Amaro Gusmão ho nia Familia husu apoio husi parte relevantes sira, tanba uma nebe sira hela agora monu impaktu husi Desastre Naturais halo sira laiha fatin atu hela ba.
“ Ami husu ba Estado atu ajuda netik ami iha tempo difisil ida ne’e, tanba agora dadaun ami hela deit iha kios ki’ik oan ida, tanba uma nebe ami hela ne’e monu tiha ona ” Amaro Gusmão Salienta.
Iha fatin hanesan Xefe Aldeia Hatu Zacarias Gusmão informa, parte husi Autoridade Lokal foti ona dadus hodi hatama ona iha Diresaun Desastre Municipio Covalima (DDMC) atu nune’e Familia Vitima bele hetan ajudos ruma.
“ha’u hanesan Xefe Aldeia Hatu, ha’u foti ona dadus ba akontesimento ne’e hodi hatama kedas ba Protesaun Sivil, CVTL no MSSI, DDMC atu nune’e ita nia Familia Vitima sira ne’e bele hetan apoio liga ho rai halai hodi hamonu sira nia uma ne’e ” Xefe Aldeia Hatu dehan iha FAtin Akontesimento.
Enkuanto Familia ne’ebe hela iha uma ne’e hamutuk na’in 5, no uma ne’ebe monu impaktu husi Rai halai, ho medida uma ne’e naruk 6 m, no luan 5 m, (5×6) no tuir observasaun rai nebe halai ho medida naruk mais ou metro 60 resin.
Entertanto iha Aldeia Hatu uma kain ida deit maka kondisaun grave, no vijinho uma kain rua mos hetan ameasado husi desastre naturais rai halai ne’e.
Jornalísta : Tynho Gusmão
Editór : Chamot Nahac
