Covalima (RCCT) 22/04/23, Partidu Os Verdes Timor (PVT) bainhira hetan fiar husi povu ba kaer ukun hakarak dezenvolve setor agrikultura ida ne’ebe diak liu iha Timor-Leste.
“Ita hakarak dezenvolve konseptu agrikultura, hanesan dezenvolve setor hortikulltura, ita atraves husi ita nia grupu sira, partidu Os Verdes iha programa hakarak investe ba koperativa sira ne’ebe ita hakarak harii iha Timor-Leste bainhira hetan fiar husi povu ba kaer ukun” deklara Sekretariu Nasional Partidu Os Verdes Timor, Sabino Menezes, iha nia intervensaun hafoin PVT hala’o kampaña eleitoral iha Suku Suai-Loro, Postu Administrativu Suai, Munisípiu Covalima, Sabadu (22/04).
Nia fo ezemplo katak rai hektares 100 atu uza ba kuda pateka, iha parte ida mos lei fo dalan atu harii industria, depois koleta pateka hotu hodi hatama ba iha industria produs sai just pateka iha Covalima ne’e Os Verdes nia mehi no planu ona bainhira hetan fiar husi povu ba kaer ukun.
“Ita labele mai dehan Delos, Delos maibe ita mos iha aifuan barak, ita mos hakarak dezenvolve pekuaria, tanba ita mos iha programa” nia dehan.
Nia afirma empreza ida hanesan MAECOM Rui Castro nian, ne’ebe ohin loron governu ida ukun ne’e lakohi fo espasu ba nia, maibe nia iha komitmentu hakarak apoiu programa Os Verdes nian.
Nia iha programa ida hakiak manu ema bolu dehan broiler, tanba Os Verdes iha pekuaria hakarak introdus programa ida ne’e ba membru koperativa sira, tanba ne’e maka rejista iha kaixa, fo sertifikadu aban bainrua ema na’in-10 ka 20 halibur hamutuk halo manu luhan ida na’in rasik maka halo programa governu atraves husi pensaun ou liu husi suvensaun partidu ne’ebe iha apoiu ba grupu sira laos foti osan fahe hanesan ida agora ne’e $ 200, $ 100 ka $ 50 maibe Verdes hakarak organizadu.
Se grupu ida kompostu husi ema na’in-20 nia halo manu luhan ida nia medida pur ezemplu 10×15 nia bele hakiak manu 1000 iha laran sosa ho folin $ 3 fo han diak no fa’an fali kada manu ida ho folin $ 5, kada manu ida grupu bele $ 2, se manan kada manu ida $ 2 manu 1000 manan hira hanoin barak ida ne’e maka planu Os Verdes bainhira manan iha eleisaun parlamentar hodi ba kaer governu.(JS)
