Covalima (RCCT) 17-06-25- Asosiasaun Hali Ba Dame (HABADA) realiza dialogu komunitaria ho joven no komunidade sira iha Suku Suai Loro, Postu Administrativu Suai, konaba promove paz iha komunidade nia let.
Diretór Ezekutivu HABADA, Abel Amaral, esplika katak liu husi dialogu ne’e introduz ba foinsa’e sira atu hatene konaba redus krimi, kria liña komunikasaun di’ak ho estrutura suku sira bainhira mosu konflitu ruma.
“atividade ida ne’e haensan dialogu komunitaria, atu promove pas iha komunidade nia let, ninia objetivu prinsipal maka oinsa atu redus krimi ka violensia, ida seluk maka oinsa komunidade bele halo komunikasaun di’ak ho estrutura konsellu suku sira bainhira moru konflitu ruma, sira bele hato’o ba malu bele prevene hodi hapara tiha violensia ne’ebé atu mosu, husu ba joven sira atu nafatin matan moris neon na’in kuandu ema ruma atu destroi seguransa iha aldeia ka suku laran, sira bele ho inisiativa rasik halo intervensaun hodi bele hapara konflitu ne’ebé mosu, tanba ne’e ho atividade ida ne’e mai atu fo hanoin fila fali violensia ne’e ho dalan saida deit la fo benefisiu” Diretór Ezekutivu HABADA, Abel Amaral, informa ba jornalista sira hafoin remata dialigu ho joven sira iha Suku Suai Loro, Tersa (17/06).
Reprezenta Embaixador Australia iha Timor-Leste, José Marçal, hatete paz no estabilidade ne’e importante, nune’e joven sira tenke sai autor ba paz no estabilidade hodi aproveita benefisiu sira ne’ebé komesa la’o dadaun ona iha Suai.
“Paz no estabilidade ba ita nia rain ne’e importante tebes, Suai hanesan fatin ida ne’ebé entrada husi Indonezia tama mai, ita tenke aproveita benefisiu ida ne’e ho di’ak, kuandu ita nia kondisaun la estabil, kondisaun la di’ak, ita involve iha konflitu susar mos mai ita, tan ne’e ha’u espera katak alin joven sira bele hola parte iha atividade ohin, ita bo’ot sira bele haburas tan ba kolega ka inan no aman sira ne’ebé ohin la hola parte iha sorumuru ida ne’e” ni dehan.
Reprezenta Administrador Postu Administrativu Suai, Luizinho do Rego, agradese ba HABADA ne’ebé ho oportunidade di’ak ida ne’e bele mai fo hanoin ba joven sira iha Suku Suai-Loro oinsa atu bele hakribi violensia ho kria paz iha komunidade nia let.
“Autoridade postu agradese ba ONG HABADA ne’ebé hili Suku Suai-Loro, ha’u hanoin prevensaun konflitu iha ita nia komunidade ne’e importante tebes, tanba ne’e maka governu liu husi Ministeriu Interior mos iha diresaun nasional prevensaun kondlitu komunitaria ne’ebé destaka destaka nia pontu fokal sira, alende ida ne’e mos ita nia ONG sira mai apoiu ita oinsa atu habelar no habo’ot liu tan programa prevensaun konflitu atu harii dame, tanba ne’e maka governu komesa inisia hanoin katak tenke investe iha area sira ne’ebé atu prevene konflitu, presija dame, presija kria paz, liliu ba iha ita nia joven sira iha sosiedade nia let. Kuandu mosu konflitu sei afeita ba dezenvolvimentu ne’ebé atu la’o iha aldeia ka suku laran” Luizinho dehan.
Asosiasaun Hali Ba Dame realiza dialogu komunitaria ho joven sira iha Suku Suai-Loro, Postu Administrativu Suai, ne’e tanba hetan apoiu husi Embaixada Australia iha Timor-Leste,
Jornalista : Julio Salinas
Editor : Chamot Nahac
