Covalima(RCCT)24-02-23—-Diretór Programa Nasionál Dezenvolvimentu Suku (PNDS), Munisípiu Covalima, Filipe Cardoso, Hateten progresu Reabilitasaun Sede Suku (RSS) iha postu administrativu tolu oras ne’e daudaun foin tama ba iha pursentu 11.8.
Progresu implementasaun reabilitasaun sede suku ba faze datoluk nian ne’ebé implementa iha Postu Administrativu Zumalai iha suku 4, Maucatar suku 4 no Postu Tilomar suku 4, ninia progresu komulativu em jeral iha suku 12 foin atinje pursentu 12.8.
“fizikamente uma sede suku daudaun ne’e halo hela reabilitasaun, iha terenu ami nia monitorizasaun ne’e sede suku barak naka sobu hotu ona, traballadór sira komesa hahu serbisu tanba balu halo reabilitasaun total sobu hotu uma kakuluk halo mudansa ba iha tipu konstrusaun uluk ho tipu 2 air, agora halo fali mudansa 4 air ida ne’e hotu sira hahu daudauk sobu no traballadór hahu serbisu” informa Diretór Programa Nasionál Dezenvolvimentu Suku (PNDS), Munisípiu Covalima, Filipe Cardoso, ba jornalista sira iha nia kna’ar fatin PNDS Covalima, Sesta (24/02).
Nia afirma relasiona ho reabilita sede suku hanesan iha sede suku Matai, Postu Administrativu Maucatar ne’e tanba dezastre iha tinan kotu mosu udan no anin bo’ot halo rai halai fo impaktu mos ba sede suku sai at grave, semente sira nakfera no uma nia isin lolon halai tanba ne’e halo mudansa ba iha dezenu oinsa bele garantia fila fali obra ba sede suku ne’e bele konklui hodi resposta urjente ruma ba xefe suku ho Konsellu suku sira katak mesmu hetan dezastre maibe utilizasaun orsamentu ne’ebe iha bele halo fila fali sede suku tuir kbi’it orsamentu ne’ebe iha.
Nia sublina iha postu administrativu Fohorem hanesan ema hotu hatene iha atividades PNDS ida maka kontinua kompleta konstrusaun ba iha Uma Naroman ba Povu faze dahuluk, depois kontinua aselera mos UNP faze daruak inklui reabilita sede suku-4 iha Fohorem.
“Defaktu iha Fohorem hanesan ita hotu hatene katak Fohorem postu administrativu ida ne’ebe maka partensia area rural, tanba ne’e saida maka sai hanesan obstaklu ne’ebe ami identifika interese fornesedor ladun iha, tanba ne’e bazeia ba mata dalan ami nia ekipa utiliza kompra direita ho montante orsamentu rihun $ 3 mai kraik, signifika katak kompra sasan ho osan montante rihun $ 3 mai kraik ninia prosesu lalaok ne’e sempre neneik, tanba fornesedo barak maka retira, no fornesedor barak maka sei dauk konklui sira nia serbisu, tanba ne’e ami informa mos ba fornesedor postu administrativu seluk kuandu laiha interese maka ami utiliza jestor finansas atu bele kompra direita ho valor orsamentu rihun $ 3 mai kraik ne’ebe utiliza fulan ida dala ida” nia dehan.
Nia afirma orsamentu ne’ebé atribui ba iha reabilitasaun sede suku bazeia kategoria ba sede suku nia fiziku balu kategoria at kman no balu kategoria at total, purtantu kada sede suku total suku 12 ne’e ninia orsamentu valor la hanesan balu hetan osan ho montante rihun $12.000.00 no balu hetan rihun $ 11.000 00.
Ho ida ne’e maka estimasaun tekniku sira halo levantamentu dadus hodi hare, observa direita molok prepara orsamentu sira teknikamente ba hare kondisoens sede suku nian, tanba ne’e reabilitasaun ba sede suku-12 ne’e ho nia valor orsamentu la hanesan.
Jornalista : JS
Editor : CN
