Covalima (RCCT) 28-04-25-Progresu dezenvolvimentu ne’ebé governu implementa iha Suku Belekasak, Postu Administrativu Maukatar, barak liu mai husi Programa Nasional Dezenvolvimentu Suku (PNDS).
Xefe Suku Belekasak Leonito Gusmão, hatete hahu husi 2024 projetu tama iha Suku Belekasak hanesan projetu estrada, projetu dada liña eletrisidade ba Aldeia-4 no iha programa PNDS, maibe kuaze tama ona tinan rua to’o tolu ona, PNDS iha la’o di’ak no barak liu.
“Komesa kedas iha tinan 2024 ita iha projetu estrada ligasaun husi Dais ba Postu Administrativu Maukatar, ita mos iha projetu dada liña eletrisidade ba Aldeia-4 ne’ebé maka iha tinan 2024 estabelesidu no agora ita iha programa PNDS ita la’o hela uma kuaze 39 konstrusaun, moru protesaun, durante tinan rua atu ba tolu ona ne’e programa la’o di’ak no barak liu ne’e programa PNDS. Belekasak susesu iha area ida ne’e, projetu nasional iha liña eletrisidade ba Aldeia-4 ne’e konatrui, estrada liga ba Aldeia-7 no liu ba Postu Maukatar sira konstrui hela no tama ba Fulan Juñu tinan ne’e remata ona” dehan Xefe Suku Belekasak, Leonito Gusmão, ba RCCT iha Dais, Sesta (25/04).
Nia afirma Projetu dada liña eletrisidade no projetu estrada liga ba Aldeia sira sei finaliza iha fulan Juñu tinan ne’e.
“Iha momentu tinan 2023-2024 iha aldeia-4, hanesan Aldeia Du’ut, Busada’o, Lolowa, Aldeia Illa, no ba projetu estrada kuaze tinan ne’e remata hanesan ha’u esplika ona katak ne’e projetu nasional konstrui hela ba Aldeia-7 liga mos ba Postu Maukatar ne’ebé tuir planu Juñu tinan ne’e remata” nia dehan.
Enkuantu tuir observasau Xefe Suku nian ba iha projetu dada liña eletrisidade atinji ona pursentu 100, projetu estrada liga ba Aldeia-7 ne’e maka foin atinji pursentu 75, maibe Planu projetu hirak ne’e sei finaliza iha fulan Junu ne’e.
Jornalista : Julio Salinas
Editor : Chamot Nahac
